महेन्द्रनगर—महाकाली अस्पतालमा रहेको आईसीयु मेसिन प्रयोग गर्ने जनशक्ति नहुँदा आईसीयु मेसिन प्रयोगबिहीन अवस्थामा थन्किएको छ । नेपाल सरकारले करिब ५ वर्ष अगाडि अस्पतालमा आईसीयु मेसिन जडान गरेको हो ।
आईसीयु मेसिन जडान गरेपनि हाल उक्त मेसिन सञ्चालन गर्ने दक्ष जनशक्तिको व्यवस्था नहुँदा हालसम्म उक्त मेसिन प्रयोगमा आउन नसकेको अस्पतालका सूचना अधिकारी केशव अवस्थीले बताए ।
उक्त आईसीयु मेसिन सञ्चालन नहुँदा यस क्षेत्रका बिरामीले आईसीयुबाट हुने सुविधाहरुबाट लाभ लिन सकेका छैनन् । आईसीयु मेसिन हाल आफै आईसीयुको अवस्थामा रहेको छ । अस्पतालले बिरामीलाई रिफर गर्न बाहेकको अन्य काम गर्न सकेको देखिदैंन् । यस क्षेत्रका धेरैले महाकाली अस्पताललाई रिफर अस्पतालका रुपमा चिनाउने गरेका छन् ।
अस्पतालको आईसीयु मेसिन जनशक्तिको अभावमा सञ्चालनमा नआएको अस्पतालका सूचना अधिकारी अवस्थीले बताए । ‘आईसीयु मेसिन सञ्चालनका लागि जनरल फिजिसियन र एनस्थेसियाको आवश्यकता पर्दछ तर उक्त जनशक्ति हाल हामीसँग व्यवस्था गर्न नसक्दा आईसीयु मेसिन सञ्चालन गर्न नसकिएको हो,’ उनले भने ।
आर्थिक वर्ष २०७१/७२ तिर सरकारले अस्पतालमा आईसीयु मेसिन जडान गरिएको भएपनि हालसम्म मेसिन सञ्चालनका लागि दक्ष जनशक्ति पठाएको छैन् । बीचमा एकजना डाक्टर पठाएको भएपनि धेरै समय बस्न नसकेपछि उनले छोडेर गएका थिए । त्यसपछि हालसम्म सरकारले अर्काे व्यवस्था गर्न नसक्दा मेसिन सञ्चालनमा नआएको अवस्थीले बताए ।
एक जनाले चल्दैन, टिम नै चाहिन्छ
आईसीयु मेसिन सञ्चालन गर्नका लागि सरकारले एक जना डाक्टरको व्यवस्था यसभन्दा अगाडि गरेको थियो । तर, हाल एकजना पनि छैनन् । व्यवस्था गरेको डाक्टर पनि धेरै समय टिक्न सकेनन् । आईसीयु मेसिन सञ्चालन गर्नका लागि एकजना मात्र डाक्टरले नपुग्ने अधिकृत अवस्थीले बताए ।
‘आईसीयु मेसिन सञ्चालन गर्नका लागि कम्तिमा पनि ३ जना दक्ष जनशक्ति आवश्यक पर्छ । जनरल फिजिसियन र एनेस्थेसियनलगायतका विभिन्न विषयमा विज्ञ जनशक्ति चाहिन्छ फेरि सधैंभरि एउटैले हेर्न सक्दैन् । बिदामा बस्दा तथा सिफ्टमा काम गराउनका लागि पनि धेरै जनशक्ति आवश्यक पर्छ, यसर्थ टीम नै चाहिन्छ,’ उनले भने ।
डाक्टरका लागि प्रदेश सरकारले पहल गर्दै
महाकाली अस्पतालमा हाल डाक्टर पनि उपलब्ध नरहेको अवस्थीले बताए । स्वास्थ्य कर्मचारी समायोजनमा डाक्टरलाई संघमा समायोजन गरेकाले भएका डाक्टर सरुवा भएका छन्, हालसम्म पठाएको छैन् ।
हाल समायोजनबाट एक जना डाक्टर पठाइएपनि सेती अस्पताल वा महाकाली अस्पतालमा अन्योलता बनाएको छ । हाल प्रदेश सरकार महाकाली अस्पतालमा डाक्टरको व्यवस्था गर्नका लागि लागि परेको डाक्टर अवस्थीले बताए । प्रदेश सरकारले ९ जना डाक्टरको लागि करारमा भर्ना खोलेको छ र डाक्टरले आवेदन दिएमा मात्र डाक्टर आउन सक्ने अवस्थीले बताए ।
२८ जना डाक्टरको दरबन्दी रहेको अस्पतालमा हाल विशेषज्ञ डाक्टर २ जना मात्रै रहेका छन् भने मेडिकल अफिसर र अन्य नर्सहरु गरेर करिब १० जनाले मात्रै अस्पताल सञ्चालन गराइरहेका छन् ।
दैनिक रुपमा करिब २ सयदेखि २ सय ५० जनासम्म बिरामी भर्ना हुने अस्पतालमा डाक्टर नहँदा उपचार तथा सेवा सुचारु गर्न समेत समस्या भइरहेको अस्पतालका सूचना अधिकारी अवस्थीले बताए ।
हाल अस्पतालमा गर्मी मौसमका कारण भाइरल जन्य रोगलगायत विभिन्न रोगका बिरामीको चाप अत्याधिक बढी रहेको छ तर प्रदेश सरकारले बिरामीको चाप र अस्पतालको दरबन्दीअनुसार विशेषज्ञ डाक्टरको व्यवस्था गर्न सकेको छैन् । जसले गर्दा दैनिक रुपमा बिरामीहरुले सास्ती भोग्नुका साथै उपचार समेत नपाउने अवस्था रहेको मेडिकल रेकर्ड अधिकृत अवस्थीले बताए ।
