एउटै टि ब्यागमा अर्बौ सुक्ष्म प्लाष्टिकका कणः अध्ययन

उच्च गुुणस्तर बताइएका केही टि ब्यागमा अर्बौ सुक्ष्म प्लाष्टिकका कण रहन सक्ने एउटा नयाँ अध्ययनले देखाएको छ । क्यानेडेली अनुसन्धानकर्ताहरुले केही टि व्यागलाई पानीमा उमाल्दा यस्तो निष्कर्षमा पुगेका हुन् । माइक्रोप्लाष्टिकका अणु हाम्रो वातवरण वरपर पाइन्छ । यो धाराको पानी, बोत्तलको पानी र केही खानेकुरामा पाइन्छ ।

विश्व स्वास्थ्य संगठन (डब्लुएचओ) ले केही दिनअघि पानीमा भेटिएका यस्ता प्लाष्टिकका कणले स्वास्थ्यमा खासै असर नगर्ने जनाएको थियो । तर, आफ्नो अनुसन्धानको निष्कर्ष सिमित सूचनाका आधारमा निकालिएको जनाउदै डब्लुएचओले सो विषयमा वृहत अनुसन्धानका लागि आव्हान समेत गरेको थियो ।

क्यानडाको मोन्टरियलको म्याक गिल युनिर्भसिटकी अनुसन्धानकर्ताहरुले माईक्रोप्लाष्टिकले स्वास्थ्यमा पार्ने प्रभावबारे अझै बढी अनुसन्धान गर्न समेत आव्हान गरेका छन् । उनीहरुले ५ मिलिमिटर लम्बाई भन्दा साना प्लाष्टिकलाई माईक्रोप्लाष्टिकका रुपमा व्याख्या गरेका छन् ।

अध्ययनका लागि अनुसन्धानकर्ताहरुले व्याबसायिक प्रयोजनमा प्याक गरिएका प्लाष्टिकका विभिन्न टि व्याग किनेका थिए । अधिकांश टि व्याग पेपरबाट बनाइएको थियो । तर, केही पिमियम ब्रान्डले भने प्लाष्टिकका प्रयोग गरेको पाईएको अनुसन्धानकर्ताहरुले बताएका छन् ।

अनुसन्धानकर्ताहरुले चियाबाट हटाएर रित्तो टिव्यागलाई ९५ सेल्सियसम्म तताएका थिए । तताउने क्रममा उनीहरुले तातो पानीमा एउटै प्लाष्टिक टिव्यागबाट ११ अबर ६ करोड माईक्रोप्लाष्टिक र ३ अरब १ करोड साना नानो प्लाष्टिक भेटेका थिए । ती कणलाई नांगो आँखाले भने देख्न सकिदैन ।

-एजेन्सीबाट भावानुवाद