नेपालगन्ज–भारतबाट नेपालगन्ज नाका हुँदै नेपाल प्रबेश गर्नेहरुमा कोभिड–१९ संक्रमण देखिने क्रम बढ्दै गएको छ । सीमा नाकामा परीक्षण गर्दा पछिल्ला दिनहरुमा दैनिक २०—३० देखि ४०—५० जना सम्ममा कोभिड–१९ संक्रमण देखिने गरेको छ ।
बाँकेमा मंगलबार विहानसम्म ८ सय ७७ जना सक्रिय संक्रमित छन् । सक्रिय संक्रमितहरुको संख्या बढ्दो छ ।
भारतबाट आउने कोभिड–१९ संक्रमितलाई ब्यवस्थित रुपमा आइसोलेसनमा राख्ने र आवश्यक परेमा औषधी उपचार गर्ने सुविधासहितको अस्थायी अस्पतालको रुपमा प्रयोग गर्ने उद्देश्यले नेपाली सेनाले नेपालगन्ज नाकामा होल्डिङ सेन्टर निर्माण सुरु गरेको हो ।
कोभिड संक्रमण तीब्र गतिमा फैलदै गएर संक्रमितहरको संख्या बढ्दै गएपनि संक्रमितहरुको ब्यवस्थापनका लागि निर्माण सुरु गरिएको होल्डिङ सेन्टरको निर्माणमा भने ढिलाइ भइरहेको छ ।
२०७६ असोज २६ गतेसम्म निर्माण सम्पन्न गर्ने २९ करोड ३८ लाखमा गरी श्री हनुमान कन्स्ट्रक्सन, हेटौडाले १ हजार बेड क्षमताको होल्डिङ सेन्टर निर्माणको ठेक्का लिएको थियो । होल्डिङ सेन्टरका २२ वटा भवन, भान्साघर, खानेपानीको टंकी सहित शौचालय भवनहरु ४ विघा ८ कठ्ठामा निर्माण भइरहेका छन् ।
निर्माण सम्पन्न हुनुपर्ने म्याद सकिएको झन्डै ४ महिना बितिसक्दा पनि होल्डिङ सेन्टरको निर्माण कार्य भने करिब ८२ प्रतिशत र वित्तिय प्रगति करिब ६४ प्रतिशत मात्रै भएको छ । नेपाल सरकारले होल्डिङ सेन्टर निर्माणका लागि समयमै बजेट निकासा नगरेका कारण निर्माण कार्यमा ढिलाइ भएको हो ।
निर्माण कार्यमा भएको भौतिक प्रगतिअनुसार साढे ३ करोड रकम भुक्तानी नहुँदा होल्डिङ सेन्टरका लागि आबश्यक पर्ने सामाग्रीहरु खरिद गर्नका लागि रकमको अभाब भएको गुनासो निर्माण ब्यवसायीको छ ।
होल्डिङ सेन्टरको निर्माण नेपाल सरकारको उच्च प्राथमिता प्राप्त आयोजना भएपनि अर्थ मन्त्रालयबाटै रकम निकासामा ढिलाइ हुँदा निर्माण कार्यले गति लिन सकेको छैन ।
भौतिक प्रगतिअनुसारको बिलको रकम भुक्तानी नभएका कारण निर्माण कार्य पुरा हुन अझै कति समय लाग्ने हो भन्ने एकिन भइसकेको छैन । निर्माण अन्तिम चरणमा पुगे होल्डिङ सेन्टर निर्माणस्थलमा सडक र ढल निकासको काम सुरुसम्म भएको छैन । सेन्टर संचालन गर्ने कार्य विधि तत्काल बनाउनुपर्ने देखिएको छ ।
होल्डिङ सेन्टर निर्माणमा ढिलाइ भएका कारण संक्रमितहरुलाई नेपालगन्ज उप–महानगरपालिकाले संचालन गरेको ५० बेड क्षमताको आइसोलेसन सेन्टरमा राख्ने गरिएको बाँकेका प्रमुख जिल्ला अधिकारी सुर्यबहादुर खत्रीले बताए । संक्रमितहरुको संख्या बढ्दै गएमा होल्डिङ सेन्टरका ३ सय बेडलाई संचालनमा ल्याउने तयारी स्थानीय प्रशासनको छ ।
