सम्पूर्ण चिकित्सकलाई काम नगर्न चिकित्सक संघको आग्रह
विराटनगर–आर्थिक संकटमा परेको विराटनगरको हस्पिटल चौकस्थित संजीवनी हस्पिटल एण्ड आइभिएफ सेन्टर प्रालिले चिकित्सक र स्वास्थ्यकर्मीहरुको दुई करोड रुपैयाँभन्दा बढी पारिश्रमिक नदिएर अस्पताल नै बन्द गरेको छ । चार जना चिकित्सकसहित १२ जनाको लगानी रहेको संजीवनीमा चरम आर्थिक संकटमा परेपछि एक साता अगाडिबाट हस्पिटल बन्द भएको हो ।
अस्पतालमा कार्यरत पाँच जना विशेषज्ञ चिकित्सक र पाँच जना मेडिकल अफिसरसहित दुई दर्जन बढी कर्मचारीले पाउनुपर्ने तलब भुक्तानी नगरेरै संचालकहरुले हस्पिटल बन्द गरेका हुन् । हस्पिटलमा कार्यरत पाँच जना डाक्टरले तीन वर्षदेखि तलब पाएका छैनन् भने ९ जना चिकित्सक र स्वास्थ्यकर्मीहरुले गत भदौदेखि तलब नपाएको गुनासो गरेका छन् ।
एक जना चिकित्सकले १० लाखदेखि ७० लाख रुपैयाँसम्म संजीवनी हस्पिटलबाट पारिश्रमिक पाउनुपर्ने छ । हस्पिटलले चिकित्सकको मात्र २ करोड रुपैयाँ तलब दिन बाँकी रहेको चिकित्सकहरुको भनाइ छ ।
हस्पिटलले पारिश्रमिक नदिएपछि कार्यरत चिकित्सकहरूले नेपाल चिकित्सक संघ कोशीमा १९ पुसमा निवेदन दिएका थिए । उनीहरूले लामो समयदेखि संजीवनी हस्पिटलमा काम गरेवापतको पारिश्रमिक नपाएको र तलब माग गर्दा पनि कुनै सुनवाई नभएको भन्दै संघमा निवेदन दिएका थिए ।
‘हामीले काम गरेको पारिश्रमिक मागेको वर्षौ भइसक्यो । काम गरेको तलब माग्दा आज दिन्छौं, भोलि दिन्छौं भनेर टार्ने मात्र काम भयो । पाउनुपर्ने पारिश्रमिक अहिलेसम्म दिएको छैन । हाम्रो माग सुनवाई नभएपछि हामी आवद्ध संघमा पाउनुपर्ने तलब दिलाइदिन हामीले संयुक्त रुपमा निवेदन हालेका हौं,’ एक चिकित्सकले भने ।
हस्पिटलको संचालकहरुमा विनायक पन्त, राजेश प्रसाईं, ओम प्रसाईं, राजकुमार मण्डल, विजय मण्डल, सुरेन्द्र रोय, डा. प्रेरणा दाहाल, डा. अन्जु देव, डा. पवन पराजुली, डा. वरुण देवलगायत रहेका छन् ।
हस्पिटलका अध्यक्ष राजकुमार मण्डल रहेका छन् । चिकित्सकहरुले तलब नपाएको विषयमा बुझ्न खोज्दा अध्यक्ष मण्डल सम्पर्कमा आउन चाहेनन् ।
चिकित्सकलाई हस्पिटलमा काम नगर्न संघको आग्रह
चिकित्सक र स्वास्थ्यकर्मीहरुले काम गरेबापतको तलब नदिने संजीवनी हस्पिटलमा काम नगर्न नेपाल चिकित्सक संघ कोशीले सम्पूर्ण चिकित्सक र स्वास्थ्यकर्मीलाई आग्रह गरेको छ । लामो समयदेखि काम गर्दै आएका चिकित्सक र स्वास्थ्यकर्मीले पाउनुपर्ने सम्पूर्ण तलब नदिएसम्म कुनै पनि चिकित्सक र स्वास्थ्यकर्मीहरुलाई काम गर्न संघले सूचना जारी गरेको हो ।
संघका अध्यक्ष डा. फरवार्ड सिलवाल र महासचिव डा. राजेन्द्र चौधरीले बुधबार उक्त सूचना जारी गरेका हुन् । ‘हस्पिटलले लामो समयसम्म चिकित्सकलाई काम गरेको तलब नदिँदा समस्यामा परेका छन् । तसर्थ हालसम्म कार्यरत चिकित्सकको भुक्तानी उक्त अस्पतालले नगर्दासम्म सो अस्पतालमा काम कारवाही नगर्न सम्पूर्ण चिकित्सकहरुमा अनुरोध गरिन्छ । यस सूचना प्रकाशित भए पश्चात उक्त अस्पतालमा काम गरी समस्या उत्पन्न भएको अवस्थामा यस संघ जवाफदेही नहुने समेत सूचित गरिन्छ,’ जारी सूचनामा उल्लेख छ ।
