विराटनगर—चिकित्सा शिक्षा आयोगले निर्धारण गरेभन्दा चार लाखभन्दा बढी रकम विद्यार्थीबाट असुली गर्न खोज्ने विराटनगरस्थित नोबेल मेडिकल कलेज विरुद्ध विद्यार्थीहरूले आन्दोलनलाई निरन्तरता दिएका छन् ।
चिकित्सा शिक्षा आयोगले तोकेको भन्दा बाहिर गएर मनलाग्दी शुल्क असुल्ने मेडिकल कलेज विरुद्ध विद्यार्थीहरूले सोमबार पनि आन्दोलनमा उत्रिएका हुन् ।
एमबीबीएस पहिलो वर्षको कक्षा सुरु भएको दोस्रो साता सुरु हुँदा पनि नोबेल मेडिकल कलेजका ८० भन्दा बढी विद्यार्थी कक्षा प्रवेश गर्न पाएका छैनन् । आयोगले निर्धारण गरेभन्दा चार लाखभन्दा बढी रकम विद्यार्थीबाट असुल्ने ध्येयमा रहेको नोबेलले आइतबार पनि ११ जना विद्यार्थीलाई मात्रै कक्षामा सहभागी गराएको छ ।
‘आज पनि सधैं कक्षा हुने ठाउँभन्दा अलग्गै लगेर ११ जनालाई पढाइएको छ,’ अतिरिक्त शुल्क बुझाउन अस्वीकार गरेका विद्यार्थीहरुले भने, ‘बुधबारदेखि कक्षा सुरु भएको हो । यो विवाद साम्य नभएसम्म कक्षा नचलाउन गरेको आग्रह कलेजले मानेन । हाम्रो पढाइ छुटिरहेको छ ।’
बुधबार गेटमै सुरक्षा गार्ड र अन्य व्यक्ति खटाएर विद्यार्थी रोकेको नोबेल प्रशासनले बिहीबार पनि रोकेको थियो । कलेजले रोकेपछि शुक्रबार विद्यार्थी गएनन् । आइतबार फेरि पढ्न गएका विद्यार्थीलाई प्रवेश नै नदिइएपछि विद्यार्थीहरुले कलेज परिसरमै प्रदर्शन गरेका थिए । ‘अरु ११ जना भित्र पढिरहँदा हामी ८० जना हाराहारी विद्यार्थीले आज प्रदर्शन गर्यौं,’ ती विद्यार्थीले भने, ‘कलेजले हामीलाई अन्याय गरिरहेको छ ।’
नोबेल डा. सुनिल शर्माको स्वामित्वमा रहेको मेडिकल कलेज हो । नेपाली कांग्रेसका नेतासमेत रहेका नोबेलका सञ्चालक डा शर्माले आफूहरुबाट अनावश्यक शुल्क असुल्न खोजेको विद्यार्थी र अभिभावकको भनाइ छ । यसअघि प्रशासनकै रोहबरमा भएको छलफलमा कलेज व्यवस्थापनले शुल्क नलिने भनेपछि विद्यार्थी र अभिभावक ढुक्क बनेका थिए । तर, बुधबारदेखि सुरु भएको कक्षा प्रवेश गर्नु अघि शुल्क अनिवार्य बुझाउन कलेजले विद्यार्थीलाई ताकेता गरिरहेको छ ।
विद्यार्थीका अनुसार यसपटक नोवेलमा एमबीबीएस पहिलो वर्षमा १ सय विद्यार्थी भर्ना भएका छन् । तीमध्ये १० जना छात्रवृत्ति अन्तर्गतका, नौ जना भारतीय छन् । केही विद्यार्थीले अतिरिक्त शुल्क बुझाएका छन् ।
विद्यार्थी र अभिभावकहरु भने चिकित्सा शिक्षा आयोगले तोकेकोबाहेकका कुनै पनि शुल्क नबुझाउने अडानमा छन् । नोबेलले एमबीबीएस भर्ना हुने विद्यार्थीबाट इन्टर्नसीप वापत २ लाख ४० हजार, विश्वविद्यालय सम्बन्धन शुल्क वापत ९८ हजार र होस्टल शुल्क १ लाख ४४ हजार लगायतका अन्य धेरै शुल्क बुझाउन विद्यार्थीलाई दवाव दिँदै आएको विद्यार्थीले बताएका छन् । चिकित्सा शिक्षा आयोगले तोकेभन्दा नोबेलले हरेक विद्यार्थीसँग ४ लाख ८२ हजार रुपैयाँ अतिरिक्त शुल्क असुल्न खोजिरहेको छ ।
चिकित्सा शिक्षा आयोगले एमबीबीएसका लागि तोकेको जम्मा शुल्क ४४ लाख ३६ हजार २५ रुपैयाँ हो । पाँच वर्षे कोर्सको प्रथम वर्षवापतको १४ लाख ८५ हजार रुपैयाँ विद्यार्थीले काठमाडौं विश्वविद्यालयलाई बुझाइसकेका छन् । नोबेलले विश्वविद्यालयबाट लिइसकेको छ ।
नोबेल मेडिकल कलेजमा भइरहेको विद्यार्थी सताउने कदमका बारे गृहमन्त्रालायले चासो लिएको छ । नोबेल मेडिकल कलेजसहितले चिकित्सा शिक्षा आयोगले तोकेको भन्दै धेरै शुल्क लिएको विषयमा गृह मन्त्रालयले ठगी मुद्दामा कार्वाही चलाउन प्रशासनलाई निर्देशन दिएको छ । गृहको निर्देशनपछि अतिरिक्त शुल्क लिएको प्रमाणसहित आए ठगी मुद्दाअन्तर्गत कारबाही गर्ने तयारी प्रशासनले गरेको हो ।
मोरङका प्रमुख जिल्ला अधिकारी काशीराज दाहालले अतिरिक्त शुल्क लिएको प्रमाणसहित सम्बन्धित व्यक्ति उपस्थित भए ठगी मुद्धाअन्तर्गत कारबाही गरिने बताए । गृह मन्त्रालयले अतिरिक्त शुल्क सन्दर्भमा पत्राचार गरेको जानकारी दिँदै उनले कानुनविपरीत शुल्क लिन नपाइने स्पष्ट पारे । गृहको निर्देशनपछि प्रशासनले मेडिकल कलेजलाई अतिरिक्त शुल्क नलिन निर्देशनसहितको पत्राचार गर्ने तयारी गरेको छ । नोबेलले अतिरिक्त शुल्क नबुझाएको भन्दै विद्यार्थीलाई कक्षा प्रवेशमा रोक लगाएको छ ।
