काठमाडौं—शहीद गंगालाल हृदय रोग केन्द्रले अन्तर्राष्ट्रिय मञ्चमा पहिलो पटक प्रेकुटेनियस क्रोनरी इन्टरभेन्सन (पीसीआई) केसको लाइभ भिडियो प्रस्तुती दिएको छ । बुधबार नेसनल हार्ट फाउन्डेसन र रिसर्च इन्स्टिच्युट बंगलादेशको संयुक्त आयोजनामा भइरहेको ‘कन्फरेन्स अफ कार्डियोभास्कुलर डिजिज’मा केन्द्रले सो प्रस्तुती दिएको हो ।
‘नेपालले यसरी अन्तर्राष्ट्रिय प्लाटफर्ममा अस्पतालबाट पीसीआई केसको लाइभ प्रस्तुती दिएको पहिलो पटक हो,’ अस्पतालका कार्डियोलोजिष्ट डा. अमृत बोगटीले भने । अस्पतालका निर्देशक डा. चन्द्रमणि अधिकारी, डा. धर्मनाथ यादवको नेतृत्वमा ६ जनाको टिमले सो लाइभ प्रस्तुती गरेको थियो ।
अस्पतालका चिकित्सकहरुले ५ दिनअघि हृद्धयघात भएर अस्पताल भर्ना भएका ५४ वर्षीय पुरुषको क्रोनरी एन्जिओ प्लाष्टि गरेका थिए । ती बिरामीको एन्जिओग्राम गरेर गर्दा मुटुको धमनीमध्ये बायाँतिर मुख्य आर्टरीको मुखबाट नै ९० प्रतिशत साघुरिएको थियो । सो प्रस्तुतीले नेपाललाई अन्तर्राष्ट्रिय मञ्चमा चिनाएको डा. बोगटी बताउँछन् ।
‘नेपालमा गंगालाल अस्पतालले अन्तर्राष्ट्रियस्तरको सेवा दिएको छ भन्ने कुरा अन्तर्राष्ट्रिय विज्ञहरुले समेत देख्न पाए,’ डा. बोगटी भन्छन्, ‘यसले देशकै गौरव बढाएको छ । यसअघि यस्तो प्रसारण हामीले गर्न पाएका थिएनौं ।’ उक्त लाइभ प्रस्तुतीमा कोरोनरी एन्जियोप्लास्टी गरेको एञ्जियोग्राम, कोरोनरी आटर्री हेर्ने इन्टर भास्कुलर अल्ट्रासाउण्डको क्रियाकलापहरु झण्डै ३० मिनेट देखाइएको थियो ।
यस्तो लाइभ प्रस्तुती नेपालजस्ता देशहरुका अस्पतालका लागि धेरै चुनौती कार्य मानिन्छ । आर्थिक पक्ष, लाइभ प्रसारण गर्नका लागि टेक्निकल अवरोध, समयमा टिम र बिरामीको व्यवस्थापन गरेर दिइएको अवधिमा सबै कुरा गरेर देखाउने भएकाले यो चुनौतीपूर्ण काम मानिन्छ । ‘तर, यी सबैको बाबजुद पनि हामीले सफल पार्न सक्यौं ।
यो संस्था र नेपालकै लागि गर्वको कुरा हो,’ उनले थपे । अस्पतालले अन्तर्राष्ट्रिय सम्मेलनहरुमा यस्ता लाइभ प्रस्तुती दिने जनाएको छ । अहिले गंगालाल अस्पतालले वार्षिक २ हजारको हाराहारीमा हृद्धयघात भएका बिरामीहरुको प्राइमरी एन्जियोप्लास्टी गरिरहेको छ ।
प्रेकुटेनियस क्रोनरी इन्टरभेन्सन (पीसीआई) के हो ?
प्रेकुटेनियस क्रोनरी इन्टरभेन्सन (पीसीआई)लाई सामान्य भाषामा स्टेन्टसहितको एन्जियोप्लास्टी भनिन्छ । यो मुटुका ब्लक भएको धमनीहरूको अवरोध खोल्ने प्रक्रिया हो । यो नन सर्जिकल प्रक्रियाबाट सम्पन्न गर्ने गरिन्छ ।
