पोखरा—म्याग्दीको बेनी अस्पतालमा बुधबार डेढ घन्टा इमर्जेन्सीबाहेक सबै सेवा अवरुद्ध भए । नियमित काम छोडेर आकस्मिक कक्ष अगाडि स्वास्थ्यकर्मी तथा कर्मचारी धर्ना बसे । स्वास्थ्यकर्मीहरु नै अस्पतालमा इमर्जेन्सीबाहेकका सबै सेवा ठप्प पार्ने गरी धर्नामा उत्रिएपछि बेनी अस्पतालमा आएका बिरामीहरु थप समस्यामा परे । अस्पतालमा आएका बिरामीको उपचार गर्न बसेका स्वास्थ्यकर्मी भने आफ्नै मन बिरामी पारेर प्रशासनसँग त्यसको उपचार खोजिरहेका थिए ।
सेवा नै ठप्प पार्ने गरी गरिएको धर्ना अचानक भएको निर्णय भने होइन । तर, अस्पतालका स्वास्थ्यकर्मी तथा कर्मचारीले सेवा रोकेको अचानकजस्तो देखिएको छ । साउनदेखिको तलब सुविधा नपाएपछि सेवा ठप्प पारेर आन्दोलनमा उत्रिनुपरेको उनीहरुको भनाइ थियो । अस्पतालका सुपरिटेन्डेन्ट डा. जितेन्द्र कँडेलले अस्पतालमा स्वास्थ्यकर्मी तथा कर्मचारीले सेवा ठप्प पार्ने गरी आन्दोलित भएको बताए । ‘१ महिना अघिदेखि नै उहाँहरुले हामी आन्दोलन गर्छौं भन्नुभएको थियो । तर, मैले पख्नुहोस् । समाधान गर्छु भनेको थिए,’ उनले भने, ‘त्यो पहल लामो समयसम्म सफल नभएपछि उहाँहरुले धर्ना गर्नुभएको हो । लेखाको जिम्मेवारी पाएका कर्मचारीले त्यसअघिका मिटिङमा छिट्टै गर्छु भन्नुभएको पनि हो ।’
सुपरिटेन्डेन्ट डा. कँडेलका अनुसार वनका कर्मचारी नारायणप्रसाद सुवेदीलाई अस्पतालको लेखाको जिम्मेवारीसमेत हेर्ने गरी मन्त्रालयले तोकेको थियो । वैशाखबाट जिम्मेवारी पाएका सुवेदीले अघिल्ला महिनामा पनि सहज भुक्तानीमा सहयोग गरेनन् । अस्पताल फार्मेसीमा औषधी उपलब्ध गराउने पार्टीले समेत भुक्तानी पाउन सकेका छैनन् । टेन्डरमार्फत औषधी उपलब्ध गराएका औषधी आपूर्तिकर्ता १/२ पार्टीले भुक्तानी नपाएपछि प्रशासनमा उजुरी गर्ने चेतावनी समेत दिएका छन् । ‘१/२ पार्टीले उजुरी गर्छाैं पनि भनेका छन् । मैले उजुरी गरे गर । लेखाको नाममा गर, मेरा नाममा नगर, मैले भुक्तानीमा कुनै काम नगरेको अवस्था छैन भन्ने गरेको छु,’ डा. कँडेल भन्छन् ।
अस्पताल व्यवस्थापन समितिका अध्यक्ष बेलबहादुर कटुवाल लेखाले राम्ररी काम नगरीदिँदा स्वास्थ्यकर्मी तथा कर्मचारी आन्दोलित भएको बताए । तलब भत्ता सुविधा पाउनुपर्ने आधारभूत माग सम्बोधनमा प्रशासनले चासो नदेखाएपछि आन्दोलनमा उत्रिनुपरेको स्वास्थ्यकर्मीको गुनासो छ । सुपरिटेन्डन्ट डा. कँडेलका अनुसार अस्पतालका स्थायी र करारका कसैले पनि साउनदेखिको तलब पाएका छैनन् । अस्पतालमा स्वास्थ्यकर्मी तथा कर्मचारी गरी १ सय २४ कार्यरत छन् । यसअघि पनि स्वास्थ्यकर्मी र कर्माचारीले तलब तथा भत्ता माग गरी दबाब र चेतावनी दिइरहेका थिए ।
स्वास्थ्यकर्मीले बिहीबार ११ बजेदेखि थालेको धर्ना डेढ घन्टापछि फिर्ता लिएका छन् । उनीहरुलाई लेखाको जिम्मेवारी पाएका सुवेदीले २२ असोजसम्म तलब भुक्तानीको व्यवस्था मिलाउने प्रतिबद्धता जनाएपछि उनीहरुले सेवा ठप्प पार्ने गरी थालिएको आन्दोलन फिर्ता लिएका हुन् । बुधबार मिटिङपछि प्रशासन र कोष तथा लेखा नियन्त्रण कार्यलयलाई पत्राचार गरिसकिएको छ भने बिहीबार आवश्यक प्रक्रिया पूरा गरी शुक्रबार तलब भुक्तानी गर्ने प्रतिबद्धतापछि अस्पतालका सेवा सुचारु भएका छन् ।
अस्पतालमा तलब भत्ता पाउने मात्रै समस्या होइन, भौतिक संरचना निर्माणमा पनि समस्या छ । निर्माण कम्पनीका ठकेदार काम गर्छु भन्ने तर नगर्ने गरेपछि भवन निर्माण अलपत्र छ । अस्पतालको आफ्नै ट्रान्सफर्मर नहुँदा र भोल्टेज अनियमित हुँदा विद्युतीय उपकरण जल्ने समस्या झन् जटिल बनेको अस्पतालले जनाएको छ ।
