नेपालगन्ज—बाँकेको खजुरास्थित सुशील कोइराला प्रखर क्यान्सर अस्पतालमा पहिलोपल्ट दूरबिन प्रविधीबाट पाठेघर र डिम्बाशयमा क्यान्सर भएका बिरामीहरुको शल्यक्रिया भएको छ । काठमाडौंबाट महिला क्यान्सर रोग विशेषज्ञ चिकित्सकलाई ल्याएर क्यान्सर अस्पतालले चिकित्सकहरुको दूरबिन प्रविधीबाट पाठेघर र डिम्बासयमा क्यान्सर भएका बिरामीको शल्यक्रिया सेवा दिएको हो ।
महिला क्यान्सर रोग विशेषज्ञ डा. सुरेश कायस्थ र विनम्र सिग्देलसहित नेपालगन्ज मेडिकल कलेज, भेरी अस्पताल र क्यान्सर अस्पताल खजुराका ८ जना विशेषज्ञ चिकित्सकहरुको टोलीले पाठेघर र डिम्बासयमा क्यान्सर भएका बिरामीहरुको शल्यक्रिया गरेका हुन् ।
बिरामीको अवस्था हेरेर सम्भव भएसम्म दूरबिन प्रविधिबाट र सम्भव नभएका बिरामीहरुको चिरेरै शल्यक्रिया गरेर उपचार गर्ने गरिएको छ ।
पहिलो दिनमा ४ जनाको दूरबिन प्रबिधिबाट र ४ चिरेरै शल्यक्रिया गरी उपचार गरिएको छ । क्यान्सर रोग विशेषज्ञसहितको चिकित्सकहरुको टोलीले ४ दिन क्यान्सर अस्पताल खजुरामा बिरामीहरुको शल्यक्रिया गर्नेछ । शल्यक्रिया लागि १८ जना बिरामीले पालो पर्खिएका छन् ।
क्यान्सरका बिरामीहरुको उपचार सेवालाई विस्तार गर्ने उद्देश्यले काठमाडौंबाट विशेषज्ञ चिकित्सकहरु ल्याएर दुरबिन प्रविधिबाट क्यान्सरका बिरामीको शल्यक्रियासहितको उपचार सेवा सुरु गरिएको अस्पतालका प्रमुख डा. कृष्ण आचार्यले बताए ।
सरकारी अस्पतालमा अत्याधुनिक प्रबिधिबाट उपचार सेवा पाएपछि बिरामीहरु लाभान्वित भएका छन् ।
दुरबिन प्रबिधिबाट गरिने शल्यक्रिया सहज र प्रभावकारी हुने महिला क्यान्सर रोग विशेषज्ञ डा. सुरेश कायस्थले बताए । क्यान्सर अस्पतालले सुरु गरेको शल्यक्रिया सेवाबाट लुम्बिनी, कर्णाली र सुदूरपश्चिम प्रदेशका क्यान्सरका बिरामीहरुहरुले सहज रुपमा उपचारका सेवा पाउन थालेका छन् ।
