काठमाडौं–झापास्थित प्रस्तावित बीएण्डसी मेडिकल कलेज एण्ड रिसर्च सेन्टरको अनुगमनमा गएको समितिले अध्ययन प्रतिवेदन नबुझाउँदा चिकित्सा शिक्षा आयोगका कार्यकारी उपाध्यक्ष प्रा.डा. श्रीकृष्ण गिरी अप्ठ्यारोमा परेका छन् ।
अनुगमनमा गएको टोलीका संयोजक र विज्ञ सदस्यले आयोगलाई प्रतिवेदन नबुझाउने जानकारी दिएसँगै कार्यकारी उपाध्यक्ष गिरी अप्ठ्यारोमा परेका हुन् । अनुगमन समितिका संयोजक प्रा.डा. प्रकाश पाण्डेले यसअघि हेल्थ आवाजसँग कुरा गर्दै आफूले प्रतिवेदन नबुझाउने बताएका थिए ।
डा. पाण्डेले प्रतिवेदन नबुझाउने भनेको १५ दिनपछि अर्का सदस्य डा. भोजराज अधिकारीले आयोगलाई पत्र लेख्दै आफूले पनि प्रतिवेदन बुझाउन नसक्ने जानकारी दिएका छन् ।
आयोगका प्रवक्ता समेत रहेका सदस्य सचिव डिल्लीराज लुइटेलले अध्ययन टोलीमा गएका संयोजक र विज्ञले कार्यकारी समितिको बैठकमा नै प्रतिवेदन बुझाउन नसक्ने जानकारी दिएको बताए । ‘उहाँहरुले कार्यकारी समितिको बैठकमा नै प्रतिवेदन बुझाउन नसक्ने जानकारी दिनुभयो,’ उनले हेल्थ आवाजसँग भने, ‘उपाध्यक्षले गोप्य रुपमा बनाउनुभएको समिति हो । अब के हुन्छ उहाँलाई मात्र थाहा छ ।’ प्रवक्ता लुइटेलले यो विषय कार्यकारी समितिभन्दा माथिल्लो तहको विषय भएकाले आफूले बोल्न नसक्ने बताए ।
किन भयो विवाद ?
२८ जेठमा बसेको आयोगको बैठकले ७ दिनभित्र बिएण्डसीको अध्ययन गरी प्रतिवेदन बुझाउन कार्यकारी समितिलाई निर्देशन दिएको थियो । कार्यकारी समितिका अध्यक्ष रहेका उपाध्यक्ष डा. गिरीले गोप्य रुपमा प्रा.डा. प्रकाश पाण्डे संयोजक, प्रा.डा. रमेश आचार्य र सेमन्त कोइरालालाई आयोगका प्रतिनिधी र डा. भोजराज अधिकारी विज्ञ सदस्य रहेको टोली गठन गरेका थिए ।
सो टोली ७ र ८ असारमा झापा गएर अनुगमन गरी फर्किएको थियो । झापाबाट फर्किएको टोलीले ११ असारमा प्रारम्भिक प्रतिवेदन लेखेको थियो । सो प्रतिवेदन बाहिर आउन नपाउँदै अनुगमनमा गएका विज्ञ डा. अधिकारी बिएण्डसी संचालक दुर्गा प्रसाई र आयोगका उपाध्यक्ष डा. गिरी बीचको गाली बेइज्जती मुद्धामा प्रसाईंको विपक्षमा साक्षी बसेको अदालतको पत्र बाहिरिएको थियो ।
सो पत्र बाहिरिएपछि अनुगमन समितिका संयोजक डा. पाण्डेले आफू र आफूसँग गएको टिमलाई उपाध्यक्ष गिरीले फसाउन खोजेको र इन्ट्रेष्ट बाँझिने मान्छेलाई पठाएको भन्दै प्रतिवेदन नबुझाउने अडान राखिरहेका छन् ।
तर, विज्ञ सदस्य डा. अधिकारीले आयोग कार्यकारी समितिका अध्यक्षलाई पत्र पठाउँदै आफ्नो प्रसाई र डा. गिरी दुवैसँग कुनै लिनु दिनु नरहेको तर विभिन्न पत्रपत्रिका र सामाजिक संजालमा नाम जोडिएर आएको हुँदा नैतिकताको आधारमा आफू अनुगमनको प्रक्रियामा संलग्न नहुने र प्रतिवेदन पनि बुझाउन नसक्ने जानकारी दिएका छन् ।
