बुटवल –लुम्बिनी प्रादेशिक अस्पताल बुटवलमा बेड अभावका कारण एक महिलाको मृत्यु भएको छ । अस्पतालको कोरोना विषेश अस्पताल धागोकारखानामा कोभिडका बिरामीले भरिभराउ छ ।
भेड अभावका कारण अक्सिजन आवश्यक रहेकी देवदह ६ की ४९ वर्षीया महिलाको मृत्यु भएको हो । बेड नभएपछि उनलाई लुम्बिनी प्रादेशिक अस्पतालको फिभर क्लिनिकमै राखिएको थिए । उनको त्यही नै ज्यान गएको अस्पतालले जनाएको छ ।
मंगलबार कोरोना संक्रमण पुष्टि भएकी उनमा उच्च ज्वरो, उच्च रक्तचाप र श्वास प्रश्वासमा समस्या थियो । उनलाई तत्कालै आईसीयूमा राखेर उपचार गर्नुपर्ने भए पनि आइसियु बेड नहुँदा उनको मृत्यु भएको छ ।
परिवारले बुटवल धागो कारखानामा सञ्चालित कोरोना अस्पतालदेखि काठमाडौंको नर्भिक र ह्याम्स अस्पतालसम्म बेड नपाएको बताएका छन् । कतै बेड नपाए पछि ती महिलाको प्रादेशिक अस्पतालको फिभर क्लिनिकमै राखेर उपचार सुरु गरिएको थियो ।
लुम्बिनी प्रादेशिक अस्पतालका सूचना अधिकारी डा विष्णु गौतमले कोरोना विशेष अस्पतालमा बेड खाली नभएको बताए । उनका अनुसार ती महिलाको फिभर क्लिनिकमै राखेर उपचार गरिएको थियो ।
रुपन्देहीमा हालसम्म कोरोना भाइरस संक्रमणका कारण १ सय ७५ जनाको मृत्यु भै सकेको छ ।
