बुटवल—तराई क्षेत्रमा गर्मी बढेसँगै लुम्बिनी प्रदेशका अधिकांश अस्पतालहरुमा झाडा पखालाका बिरामी बढ्न थालेका छन् । तराईका क्षेत्रहरुमा गर्मी सुरु हुँदा झाडा पखालाका बिरामी देखिने गरेपनि यस पटक देखा परेको झाडा पखाला भने फरक किसिमको रहेको चिकित्सकहरुको भनाइ छ ।
यो पटक देखा परेको झाडा पखाला निको हुन झण्डै एक हप्ता लाग्ने गरेको छ । झाडा पखाला निको हुन लामो समय लाग्ने र नियमित औषधी चलाउनुपर्ने अवस्था रहेको डा. सन्तोष भुषाल बताउँछन् ।
‘मौसम परिवर्तन हुँदा झाडा पखालाका बिरामीहरु देखिन्छन् । त्यो सामान्य नै हो तर यस पटक फरक किसिमले देखा परेको छ,’ उनले भने ।
लुम्बिनी प्रदेशका अधिकांश अस्पतालहरुमा झाडा पखालाका बिरामीको चाप बढ्दै गएको छ । लुम्बिनी प्रादेशिक अस्पताल बुटवलमा दैनिक झण्डै एक सयको हाराहारीमा झाडा पखालाका बिरामी आउने गरेको तथ्यांक छ ।
झाडा पखालाका बिरामीमध्ये अधिकांश बालबालिका छन् । बालबालिकाकालाई खानपान र सरसफाइमा ध्यान दिन नसक्दा झाडापखला देखा परेको बालरोग विषेशज्ञ डा. सन्तोष पोखरेल बताउँछन् ।
झाडा पखालाका कारण जलवियोजनको जोखिम
झाडा पखालाका कारण जलवियोजनको जोखिम बढेको छ । झाडा पखाला हुँदा शरीरमा पानीको मात्रा कम हुँदै जाने हुँदा जलवियोजनको जोखिम बढेको डा. पोखरेल बताउँछन् । बिरामीमा जलवियोजन भएको पाइएमा सलायन चढाउनु पर्ने हुन्छ । जलवियोजन हुँदा तिर्खा लागिरहन्छ, ओंठ मुख सुख्खा हुने, रुदा आँशु नआउनेजस्ता लक्षण देखिन्छन् ।
झाडा पखालाले कमजोर बनाउनुका साथै आँखाभित्र गाडिने समस्या देखा पर्ने गर्दछ । यस्तो बिरामीले झर्को मान्ने, बेचैन हुने, शिथिल हुनेजस्ता लक्षण देखिने हुँदा सचेत रहन चिकित्सकको सुझाव छ ।
कसरी बच्ने ?
फोहोर पानी, खाना र रोगीको दिशाबाट झाडा पखाला सर्ने हुँदा सरसफाइमा ध्यान दिनुपर्ने चिकित्सक बताउँछन् । सडेगलेको बासी खाना नखाने, बालबालिकालाई हात राम्रोसँग धोएर मात्र खाना खान दिने, पानी उमालेर पिउने गरेमा पनि झाडा पखालाबाट बच्न सकिने डा. पोखरेलको भनाइ छ ।
बिरामीलाई प्रशस्त सफा पानी पिउन लगाउनुपर्ने र अवस्था हेरी अस्पताल पु¥याउनुपर्नेमा चिकित्सकको जोड छ ।
