बुटवल—रुपन्देही जिल्लामा दोस्रो चरण अन्तर्गतको खोप अभियान आइतबारदेखि सुरु भएको छ । यो अभियान जिल्लाका ८ वटा पालिकामा सुरु भएको हो ।
चरणवद्ध रुपमा खोप लगाउने योजनाअनुरुप १६ पालिकामध्ये ८ पालिकामा जेष्ठ नागरिकका लागि कोरोना भाइरस विरुद्धको खोप दिन लागिएको छ ।
दोस्रो चरणको अभियानअन्तर्गत रुपन्देहीका तिलोत्तमा नगरपालिका, देवदह नगरपालिका, ओमसतिया गाउँपालिका लुम्बिनी साँस्कृतिक नगरपालिका, कोटहीमाई गाउँपालिका, मर्चवारी गाउँपालिका, सम्मरीमाई गाउँपालिका र रोहिणी गाउँपालिका रहेका छन् ।
आइतबारदेखि सुरु अभियानमा जिल्लाका सबै जेष्ठ नागरिकलाई खोप दिने गरी व्यवस्थापन भैरहेको जिल्ला स्वास्थ्य कार्यलय रुपन्देहीका प्रमुख डा. राजेन्द्र गिरीले बताए ।
स्वास्थ्य कार्यालय रुपन्देहीका प्रमुख डा. गिरीकाअनुसार रुपन्देहीका १६ पालिकामा रहेका ६५ वर्षभन्दा माथिका ५२ हजार ६ सय ८७ जनालाई दुई चरणमा कोरोना बिरुद्धको खोप लगाइने छ । जिल्लाभरी खोप कार्यक्रम संचालनका लागि ८३ खोप केन्द्र, ५ सय ५८ स्वास्थ्यकर्मी र २ सय ४६ स्वयमंसेवक परिचालन गरिनेछ । यद्यपि, आइतबारबाट सुरु हुने अभियानका लागि भने ४६ वटा खोप केन्द्र निर्धारण गरिएको छ ।
यसअघि बुटबल उपमहानगरपालिका, सैनामैना नगरपालिका, कञ्चन गाउँपालिका, मायादेवी गाउँपालिका, गैडहवा गाउँपालिका, सिद्धार्थनगर नगरपालिका, सियारी गाउँपालिका, सुद्धोधन गाउँपालिकामा खोप लगाइसकिएको छ ।
खोप लगाएपछि हुनसक्ने आपतकालीन अवस्थाका लागि पूर्व तयारी समेत भएको डा. गिरीले बताए । आप्तालीन अवस्थाका लागि सबै पालिकाहरुमा चिकित्सकसहितको टोलीको ब्यवस्थापन गरिएको उनले बताए ।
खोप अभियानको अनुगमन समेत गर्ने गरी संयन्त्र तयार भएको उनको भनाइ छ । अनुगमनका लागि पालिका प्रमुख, वडा अध्यक्ष, प्रमुख प्रशासकीय अधिकृत र जिल्ला खोप समन्य इकाईको सहभागितामा अनुगमन, सुपरिवेक्षण र सहजीकरणको व्यवस्था मिलाइएको डा. गिरीले बताए ।
पहिलो डोज खोप लगाएको १० देखि १२ हप्ताको फरकमा दोस्रो डोज खोप लगाउनुपर्छ । त्यसका लागि समेत तयारी गरिएको उनले जानकारी दिए ।
