काठमाडौं—काठमाडौं मेडिकल कलेज पब्लिक लिमिटेडको प्रिन्सिपलबाट राजीनामा दिएर बाहिरिएकी प्रा.डा. चन्दा कार्की काठमाडौं सिनामंगलस्थित नोबेल हस्पिटलमा प्रमुख कार्यकारी अधिकृत (सिइओ) नियुक्त भएकी छन् । प्रा.डा. कार्की सिइओसँगै नोबेलको पारमेडिक्स र नर्सिङ कलेजको प्रिन्सिपलको जिम्मेवारी पनि सम्हानेछिन् ।
‘उहाँ (प्रा.डा.चन्दा कार्की) प्रमुख कार्यकारी अधिकृत तथा कलेजको प्रिन्सिपलमा नियुक्त हुनुभएको छ,’ नोबेलका सल्लाहकार तथा पूर्व अस्पताल कोर्डिनेटर डा लोचन कार्कीले हेल्थआवाजसँग भने, ‘नोबेलको ठूलो अस्पताल बन्दैंछ । त्यसैका लागि टिम एक्स्पान्ससहितको अधिकार लिएर उहाँ आउनुभएको हो ।’
स्रोतकाअनुसार अहिले डा. चन्दा मात्र आएपनि विस्तारै उनले आफू अनुकूल टिम निर्माण गर्ने गरी नोबेलमा भित्र्याइएको हो ।
डा. कार्कीसँग केएमसी २० वर्ष काम गरेको अनुभव छ । उनी उक्त अवधिमा ४ वर्ष केएमसीको सिइओ र ८ वर्ष मेडिकल कलेजको प्रिन्सिपलमा रुपमा कार्यरत थिइन् । उनी कर्मचारीका तर्फबाट केएमसीको बोर्डमा समेत थिइन् ।
केएमसीमा विराटनगरस्थित नोबेल मेडिकल कलेजका सञ्चालक सुनिल शर्मा भित्रिएसँगै डा. चन्दासहित ११ जना चिकित्सक र करिब पाँच दर्जन कर्मचारीले राजीनामा दिएका थिए ।
नोबेल हस्पिटलले पारामेडिक्स तथा नर्सिङ तर्फको कलेज पनि सञ्चालन गरिरहेको छ । यसको पूरानो बानेश्वर ओरालोमा २ सय शैय्याको अत्याधुनिक अस्पताल निर्माणको अन्तिम चरणमा छ ।
उक्त नयाँ भवनबाट ६ महिनाभित्र सेवा दिने तयारी व्यवस्थापनको छ ।
यो पनि पढ्नुस्
