बुटवल—कोभिड—१९ महामारीका बेला अग्रभागमा खटिएका डाक्टरहरुले जोखिम भत्ता नपाएपछि सामूहिक राजीनामा दिएका छन् । बुटवलको कोभिड–१९ कोरोना विशेष अस्पतालमा कार्यरत ७ जना चिकित्सकले सामूहिक राजीनामा दिएका हुन् ।
चिकित्सकहरुको बुधबारको राजीनामाका कारण बिहिबार स्वास्थ्य सेवामा समस्या देखिएको छ । विगत लामो समयदेखि नै भत्ता नपाएको गुनासो गर्दै आएका चिकित्सकहरुले अन्तिम उपाएका रुपमा राजीनामा दिएका हुन् ।
चिकित्सकहरुले गत वैशाखदेखि भत्ता नपाएको गुनासो गर्दै आएका थिए । कोरोना अस्पतालका कार्यरत सबै स्वास्थ्यकर्मीलाई महामारी सुरू भएयता जम्मा ३८ दिनको मात्र जोखिम भत्ता अस्पतालले उपलब्ध गराएको छ ।
अस्थायी अस्पताल लुम्बिनी प्रादेशिक अस्पतालको मातहतमा सञ्चालित छ । राजीनामा दिनेमा ७ जना मेडिकल अफिसर छन् । अस्पतालमा ९ जना मेडिकल अफिसर करारमा कार्यरत भएपनि २ जनाले यसअघि नै अस्पतालप्रति असन्तुष्टि जनाउँदै काम छाडिसकेका थिए ।
राजीनामा दिनेमा ३ जना महिला र ४ जना पुरुष मेडिकल अफिसर रहेका छन् । दशैंअघि पनि ३ महिनासम्म मासिक पारिश्रमिक र जोखिम भत्ता नपाएपछि ९ जना स्वास्थ्यकर्मीले सामूहिक राजीनामा दिएका थिए ।
अस्पतालका मेडिकल सुपरिटेन्डेन्ट डा. राजेन्द्र खनालले अस्पतालमा कार्यरत डाक्टरहरुले मानवीय धर्म तथा पेशागत दायित्वबाट भाग्न नहुने बताए । उनले समस्याको समाधान छलफल र वार्ताबाट गर्न सकिने बताए । ‘उहाँहरुको समस्या हामीले बुझेका छौं । माथिबाट नै भत्ता वापतको रकम नआएका कारण माग पुरा हुन नसकेको हो,’ उनले भने ।
कोरोना विशेष अस्पतालमा ५ वटा भेन्टिलेटर, १६ वटा मोनिटर, १६ वटा आईसीयु र ३६ वटा आइसोलेसन शैय्या छन् ।
