कोरोनाबाट नेपालमा एक हजारको मृत्यु, ५७ प्रतिशत ६० वर्ष माथिका (कुन उमेरका कतिको मृत्यु?)

हेल्थ आवाज मंगलबार, २०७७ कात्तिक १८ गते, १७:४० मा प्रकाशित

काठमाडौं– नेपालमा कोभिड–१९ का कारण ६० वर्षभन्दा माथिका ५ सय ७५ जना अर्थात् ५७ दशमलव २७ प्रतिशत वृद्धवृद्धाले ज्यान गुमाएका छन् । स्वास्थ्य तथा जनसंख्या मन्त्रालयको १८ असोजसम्मको तथ्यांकअनुसार सबैभन्दा बढी ६० वर्षभन्दा माथिका मानिसले कोभिडका कारण ज्यान गुमाएको देखिन्छ । यो सँगै नेपालमा १ हजार ४ जना कोरोना संक्रमितको मृत्यु भएको छ ।

यसपछि ५१ देखि ५९ वर्ष उमेरसमुहका १ सय ३५ जना कोरोना संक्रमितले ज्यान गुमाएका छन् । यस्तै, ४१ देखि ५० वर्ष उमेरसमुहका १ सय २८ जना, ३१ देखि ४० वर्ष उमेरसमुहका १ सय २ जना, २१ देखि ३० वर्ष उमेर समुहका ३७ जना, ११ देखि २० वर्ष उमेरसमुहका १५ जना, ५ दिनदेखि १० वर्षसम्म ११ जना र उमेर नखुलेको १ जनाले ज्यान गुमाएका छन् ।

आखिर ६० वर्षभन्दा माथिका कोरोना संक्रमितको बढी मृत्यु हुनुको कारण के हो ? टेकु अस्पतालका सरुवा रोग विशेषज्ञ डा. अनुप बास्तोला मधुमेह, दम र मोटोपना भएका कोरोना संक्रमित व्यक्तिहरुलाई बढी असर गरेको बताउँछन् । ‘मधुमेह, दम भएका वृद्धवृद्धालाई कोरोनाले बढी चापेको छ,’ उनी भन्छन्, ‘त्यसैले यो उमेरसमूहका मानिसको मृत्यु संख्या बढी देखिएको हो ।’

यस्तै, कोरोनाका कारण ३१ देखि ४० वर्ष उमेरसमुहका १ सय २ जनाको मृत्यु भएको छ । यसमा मोटोपना र मधुमेहका समस्या भएका मानिसहरुको ज्यान गइरहेको बास्तोला बताउँछन् । होम आइसोलेसनमा बसेर समयमै अस्पताल नआउँदा पनि मृत्यु हुनेको संख्या बढ्दै गएको उनको ठम्याइ छ ।