काठमाडौं—थापाथलीस्थित परोपकार प्रसुति गृहमा नुवाकोटकी २८ वर्षीया सोमिका तामाङले शल्यक्रियामार्फत ५ वटा शिशु जन्माइन् । सोमबार शल्यक्रियामार्फत जन्मिएका ५ शिशुमध्ये एक जनाको गर्भमै मृत्यु भएको थियो ।
शल्यक्रियामार्फत शिशुहरु जन्माउनुअघि उनको गर्भमा चार वटा मात्रै शिशु रहेको मेडिकल परीक्षणहरुले देखाएका थिए । जसमध्ये एउटाको तीन हप्ताअघि नै मृत्यु भएको थियो । एक मृतसहित चार वटा शिशु गर्भमा रहेकी सोमिकाको शल्यक्रिया गर्ने टिमको नेतृत्व गर्ने जिम्मेवारी स्त्री तथा प्रसुति रोग विशेषज्ञ डा. कीर्तिपाल सुवेदीले पाए । त्यतिबेलासम्म शल्यक्रिया गर्ने टिमलाई समेत उनको गर्भमा पाँच वटा शिशु छन् भन्ने थाहा थिएन ।
सुरुमा चार वटा शिशु निकाल्ने जिम्मेवारी आफूमाथि आइपर्दा अलि डर लागेको डा. सुवेदीले बताए । मंगलबार हेल्थआवाजसँगको भिडियो कुराकानीमा डा. सुवेदीले भने, ‘चार शिशु गर्भमा रहेकी गर्भवतीको आकस्मिक शल्यक्रिया गर्नुपर्ने अवस्था आयो । त्यसको जिम्मेवारी आफैले निर्वाह गर्नुपर्दा अलिकति डर लागेको थियो । शल्यक्रियाका क्रममा पाँच वटा शिशु रहेको पाइयो । तर, शल्यक्रिया सफल भएपछि भने अहिले खुसी छु ।’
शल्यक्रियामार्फत ४ वटा जीवित शिशुका बुवा बनेका हरिकुमार तामाङले एकै पटक घरमा चार वटा लक्ष्मी भित्रिदा खुशी लागेको बताए । ‘मेरी श्रीमतीको गर्भमा चार वटा शिशु छन भन्ने कुरा पहिले नै थाहा थियो,’ उनले भने, ‘पाँच वटा छन भन्ने शल्यक्रियापछि मात्रै थाहा भयो । तर, एकै पटक चार वटा लक्ष्मी घरमा भित्रिदा म निकै खुसी छु ।’
अहिले सोमिका र उनका तीन वटा शिशुको स्वास्थ्य सामान्य छ । एक जना शिशुको श्वास प्रश्वासमा समस्या देखिएपछि उनलाई एनआईसीयुमा राखेर अक्सिजन दिइएको बाल रोग विशेषज्ञ डा. श्रद्धा श्रेष्ठले जानकारी दिइन् ।
