काठमाडौं—प्रधानमन्त्री केपी शर्मा ओली स्वास्थ्य अवस्था सामान्य भएपछि विहानैदेखि भेटघाटहरुमा ब्यस्त भएका छन् । बालुवाटारनिकट स्रोतकाअनुसार बिहीबार टाउको दुखेपछि प्रधानमन्त्रीले केही समय रेष्ट लिएका थिए ।
प्रधानमन्त्रीले रेष्ट लिएपछि मिडियाहरुमा उनको स्वास्थ्य अवस्थालाई लिएर पुनः सिंगापुर जाने चर्चा चलेको थियो । तर, स्वास्थ्य अवस्था सामान्य भएपछि शुक्रबार विहानैदेखि प्रधानमन्त्री नियमित भेटघाटमा ब्यस्त बनेका छन् ।
‘प्रधानमन्त्रीको स्वास्थ्य अवस्था अहिले सामान्य छ,’ प्रधानमन्त्रीका एक स्वास्थ्य सल्लाहकारले भने, ‘अहिले विहान ज्वरो नाप्दा ९८ डिग्री फरेनाइट छ । विहानैदेखि आफ्ना नियमित भेटघाटहरुमा ब्यस्त हुनुहुन्छ ।’ ती चिकित्सकअनुसार सिंगापुरबाट प्रधानमन्त्री स्वास्थ्य परीक्षण गरेर आएपछि पनि पहिलेकै औषधि नियमित रुपमा सेवन गरिरहेका छन् ।
बिहीबार अस्वस्थ भएपछि तत्काल पुनः सिंगापुर जाने छलफल भएको समाचारहरु बाहिरिएका थिए । तर, तत्कालै सिंगापुर जानुपर्ने अवस्था नरहेको ती चिकित्सकले हेल्थआवाजलाई बताए ।
‘फ्लोअपका लागि केही पछि जाने कुरा फरक हो,’ उनले भने, ‘तर, हल्ला आएजस्तो तत्कालै जानुपर्ने अवस्था छैन् ।’
