बुटवल—रुपन्देहीको तिलोत्तमा नगरपालिकामा अधिकांश वडामा आधारभूत स्वास्थ्य केन्द्र सञ्चालनमा आउन थालेका छन् । नगरपालिकाले सबै वडाहरुमा आधारभूत स्वास्थ्य सेवा विस्तारको कामलाई तीव्रता दिएसँगै स्वास्थ्य केन्द्रहरु संचालनमा आउन थालेका हुन् ।
चालू आर्थिक वर्षमा सबै वडाहरुमा स्वास्थ्य संस्था पु¥याउने नीति लिएको नगरपालिकाले सो कार्यलाई तीव्रता दिएको छ ।
नगरपालिकाको वडा नं १ र ३ मा दुई वटा सरकारी स्वास्थ्य संस्था एकै दिन सञ्चालनमा ल्याएसँगै नगरक्षेत्र भित्र सरकारी स्वास्थ्य संस्थाको संख्या १३ पुगेको छ । ‘नगरपालिकामा रहेका सवै वडाहरुमा स्वस्थ्य केन्द्रहरु स्थापनाको तयारीमा छौं । नगर सरकारले लिएको नीतिअनुरुप काम भैरहेको छ,’ तिलोत्तमा नगरपालिकाका नगरप्रमुख वासुदेव घिमिरेले भने, ‘आधारभूत स्वास्थय सेवाबाट कोही बञ्चित हुनुहुँदैन् । सरकारी स्वास्थ्य संस्थाबाट पनि गुणस्तरीय सेवा पाइन्छ । तपाईहरु विश्वस्त हुनुहोस् ।’
नगरपालिकामा एउटा आयुर्वेद औषधालय समेत संचालनमा छ । प्राचीन उपचार पद्धतिलाई अवलम्बन गर्नुपर्छ भन्ने मान्यताअनुरुप औषधालय संचालनमा ल्याइएको स्वास्थ्य शाखा प्रमुख मोती पौडेलले बताए ।
नगरपालिकाले केही दिनभित्रैं वडा नं ९ र १२ मा पनि आधारभूत स्वास्थ्य केन्द्र स्थापना गरी सेवा प्रवाह गर्ने तयारी गरेको छ । हरेक वडामा कम्तिमा एउटा सरकारी स्वास्थ्य संस्था स्थापना गर्ने नीतिअनुसार तिलोत्तमामा स्वास्थ्य चौकी नभएका वडाहरुमा आधारभूत स्वास्थ्य केन्द्र स्थापना गर्ने गरी काम भैरहेको छ । स्वास्थ्य केन्द्रका आफ्नै सुविधासम्पन्न भवनहरु समेत निर्माण भैरहेका छन् ।
हालसम्म तिलोत्तमाका वडा नं १, २, ३, ४, ६, ७, ८, १०, ११, १४, १६ र १७ मा सरकारी स्वास्थ्य संस्थाहरु सञ्चालनमा आइसकेका स्वास्थ्य शाखा प्रमुख पौडेलले बताए ।
आधारभूत स्वास्थ्य केन्द्रमा सामान्य उपचार, परिवार नियोजन, पोषण तथा एकीकृत बालरोग व्यवस्थापन, गर्भवती जाँच तथा सुत्केरी जाँच, खोपलगायतका सेवाहरु उपलब्ध छन् । केन्द्रमा पारामेडिक्सको नेतृत्वमा स्वास्थ्यकर्मीहरु कार्यरत रहने छन् ।
