विराटनगर – पातलो शरीर । निन्याउरो अनुहार । हिडडुल गर्न गाह्रो छ । एक ठाउँदेखि अर्को ठाउँसम्म पुग्न सक्ने शरीरमा तागत छैन । उनी हुन्-उदयपुर चौधन्डीगढी नगरपालिका – ९ की ३१ वर्षीया दुवै मृगौला पीडित टिका कुमारी बस्नेत थापा । दुवै मृगौलाले काम नगरेपछि चार वर्षदेखि उपचार गर्दै आएकी छिन् । भएको सम्पती बेचर उपचार गरेर १५ लाखभन्दा बढी उपचारमा पैसा सकेपछि टिका कुमारीले मनकारीहरूसँग मृगौला प्रत्यारोपणको लागि सहयोगको याचना गरेकी छिन् ।
दुवै मृगौला फेल भएपछि अहिले उपचारको लागि विराटनगर आएकी छिन् । ‘२८ वर्षको उमेरमा मृगौला फेल भयो । काठमाडाैंका सबै अस्पताल चहारेँ, पैसा सकियो रोग निको भएन्,’ उनले भनिन्, ‘मृगौला प्रत्यारोपण गर्न सके बाँच्ने चिकित्सकले भन्नुभएको छ । यसको लागि खर्चिलो हुने रहेछ । सहयोग पाए उपचार गरेर बाँच्ने रहर छ ।’
सरकारले मृगौला पीडितको डायलाइसिस गर्दा शुल्क नलाग्ने भनेपनि महंगोमा इन्जेक्सन र औषधी किन्नुपरेको उनको गुनासो छ । ‘सरकारले निःशुल्क डायलाइसिस हुन्छ भनेको छ । तर, औषधि र इन्जेक्सन किन्दा हप्तामा पाँच हजारभन्दा बढी खर्च हुन्छ’ ,उनले भनिन्, ‘अहिलेसम्म १५ लाखभन्दा बढी खर्च भइसक्यो । रोग जाति हुन सकेको छैन ।’ आफू रोगी भएपछि जीवन भरी साथ दिने भनेर विवाह गरेको श्रीमानले पनि छोडेको टिकाकुमारीले बताइन् ।
‘अहिले ६ वर्षकी छोरी छ । श्रीमान तेजबहादुर थापा बैदेशिक रोजगारमा कतारमा हुनुहुन्छ,’ टिकामायाले भनिन्, ‘आफूलाई रोगले च्यापेपछि श्रीमान अहिले सम्पर्कविहिन हुनुभयो । बिरामी परेर थला परेको अवस्थामा अझै धेरै श्रीमानले साथ सहयोग दिनुपर्ने थियो । श्रीमान लापता हुनुहुन्छ । फोन गर्दा काटिदिने गर्न थाल्नुभएको छ ।’ केही दिन अगाडी फोन गर्दा आफूले अर्कै विवाह गरेको र आउने दिनमा फोन नगर्नु भनेको उनले सुनाइन् ।
अहिले टिकाकुमारीले विराटनगरस्थित नोबल अस्पताल डाइलाइसिस गर्दै आएकी छिन् । अध्ययन गर्न विराटनगरमा बसोवास गर्दै आएकी भतिजी छोरी कविता थापाको डेरामा बसेकी छिन् । ‘घरमा आम्दानी छैन, काकीको आफ्नो कमाइ छैन । डायलाइसिस गर्नपनि गाह्रो भएको छ,’ छोरी कविताले भनिन्, ‘काकीको मृगौला प्रत्यारोपण गरेर बाँचेको हेर्ने इच्छा छ ।’
टिकाकुमारीको माइतीले पनि उपचारमा धेरै पैसा खर्च गरिसकेका छन् । उनीहरूले उपचारका लागि धेरै सरकारी निकाय र संघसंस्था धाएपनि सहयोग नपाएको गुनासो गरेका छन् । टिकाकुमारीले उपचारमा सहयोगको लागि देश विदेशमा रहनुभएका सबैमा सहयोग गरिदिन आग्रह गरेकी छिन् । उनको सम्पर्क नम्बर ९८१५७०७२८३ रहेको छ । टिकाकुमारीलाई सहयोग गर्नको लागि उनको सानिमा बैंकको ०६७०११०९००००२ नम्बरको खाता रहेको छ ।
