काठमाडौं—सामान्य प्रशासन मन्त्रालयले वीर अस्पतालको सांगठनिक तथा व्यवस्थापकीय सर्वेक्षण (ओएनएम) तत्काललाई रोकेको छ । स्वास्थ्य तथा जनसंख्या मन्त्रालयले वीर अस्पतालको सांगठनिक संरचना परिर्वतन गर्नका लागि १२ औं तहसम्मका कर्मचारी रहने गरी आएको प्रस्ताव सामान्य प्रशासन मन्त्रालय पठाएको थियो ।
स्वास्थ्यले पठाएको प्रस्ताव प्रक्रिया विपरित रहेको भन्दै तत्काललाई रोकिएको हो । ओएनएमको प्रक्रिया पु¥याएर मात्र अगाडि बढ्नका लागि स्वास्थ्य मन्त्रालयका अधिकारीहरुसँग छलफलको तयारीमा रहेको संघीय मामला तथा सामान्य प्रशासन मन्त्रालयको संघीय मामिला महाशाखाका सह—सचिव वसन्त अधिकारीले बताए ।
‘वीर अस्पतालको ओएनएम आएको छ । तर, पक्रिया पूरा नगरी आएको छ,’ उनले भने, ‘प्रक्रिया नपुगेको काम कसरी अगाडि बढ्छ र ? । उनले स्वास्थ्य मन्त्रालयसँग यस विषयमा छलफल गरेर प्रक्रिया पूरा भएर आएपछि मात्र अगाडि बढाउनले जानकारी दिए ।
वीर अस्पतालले एक महिना अघि १२ औं तह दरबन्दीसहित ओएनएम बनाएर स्वास्थ्य तथा जनसंख्या मन्त्रालय पठाएको थियो । सो प्रस्ताव स्वास्थ्यले सामान्य प्रशासनलाई पठाएको थियो ।
