काठमाडौं—पेशाले नर्स कविता भुजेलको स्थायी ठेगाना काठमाडौं—१७ कुश्लेचौर हो । मिति २०६७ जेठ १ गतेदेखि उनी शहिद शुक्रराज ट्रपिकल तथा सरुवा रोग अस्पताल टेकुमा कार्यरत छन् । अस्पतालमा कार्यरत रहँदादेखि उनले आफ्नो घर छाडेर अस्पतालको क्वार्टर प्रयोग गर्दै आएकी हुन् ।
टेकु अस्पतालकाअनुसार अहिले भुजेल बीएन अध्ययनका लागि अध्ययन बिदामा छन् । कानुनतः अध्ययन बिदामा भएको व्यक्तिले अस्पतालको क्वार्टर प्रयोग गर्न मिल्दैन । अस्पतालले स्वास्थ्य मन्त्रालयमा पठाएको पत्रमा भुजेलले ०७४ पुस १३ देखि ०७७ पुस १२ सम्म तीन वर्षका लागि अध्ययन विदा स्वीकृत गराएको उल्लेख गरेको छ । साथै, पटक—पटक क्वार्टर खाली गर्नसमेत अस्पतालले मौखिक अनुरोध गरेको छ ।
कर्मचारी समायोजनमा उनको दरबन्दी सिन्धुली गाउँपालिकामा भएको छ । तर, उनी अहिले पनि अस्पतालको क्वार्टरमै बसोवास गरिरहेकी छन् । कोरोना महामारीको समयमा अस्पतालमा कार्यरत कर्मचारीले कोठा नपाएको बेला उनले क्वार्टरका तीन वटा कोठा कब्जा गरेकी छन् । अस्पतालले पटक—पटक क्वार्टर खाली गर्न परिपत्र गरेको छ । तर, उनी शक्तिकेन्द्रको दबाबमा क्वार्टरमै बस्दा जोखिममा काम गरेका सुइपर र अन्य कर्मचारीलाई आइसोलेसनमा राख्ने ठाउँ नभएको अस्पतालका प्रशासन प्रमुख रुपनारायण खतिवडाले बताए ।
अस्पतालको क्वार्टरमा बसेका केही कर्मचारीलाई हटाएर आईसीयुमा काम गर्ने १९ जनालाई राखिएको छ । केही कोठा खाली नभएकाले अन्यको व्यवस्थापन गर्न निकै कठिन भएको अस्पतालले जनाएको छ । भुजेलले प्रयोग गरेको तीन कोठा खाली भए ७ जनासम्म कर्मचारी यो बेला राख्न सकिने खतिवडाले बताए ।
खतिवडाले भने, ‘उहाँ (भुजेल) ले तीन वर्षको अध्ययन बिदा स्वीकृत गराएर आफ्नो घर वा अन्तै कोठा लिएर बस्नुपर्ने हो । अस्पतालमा काम पनि गर्नु भएको छैन । काम गर्ने कर्मचारीहरुलाई बस्नको लागि कोठा पनि छाड्नु भएको छैन ।’ पटक—पटक अस्पतालबाट आग्रह हुँदा समेत कोठा छाड्न अटेर परेपछि मन्त्रालयलाई परिपत्र गर्दै हटाउने तयारीमा प्रशासन पुगेको उनले बताए । अस्पतालले एक हप्ता भित्र कोठा खाली गर्न निर्देशन दिएको जनाएको छ ।
