जनकपुर– पर्साको सदरमुकाम वीरगञ्जमा लागेको निषेधाज्ञा भदौ २५ गतेसम्म थप भएको छ । जिल्ला प्रशासन कार्यालय पर्साले बिहीबार दिउँसो सूचना जारी गर्दै भदौ २५ गते राती १२ बजेसम्म लागि निषेधाज्ञा थप गरेको हो ।
पर्साका प्रमुख जिल्ला अधिकारी आसमान तामाङको अध्यक्षतामा बसेको जिल्ला सुरक्षा समितिको बैठकले निषेधाज्ञाको समय थप गर्ने निर्णय गरेको हो । निषेधाज्ञा लम्बिए पनि बजार क्षेत्रलाई भने केही खुकुलो बनाउने भएको छ । बजार क्षेत्रमा आलोपालो गरेर खोल्न दिने बैठकले निर्णय गरेको छ ।
मुख्य बजारका पसलहरु बिहान ११ बजेदेखि दिउँसो ४ बजेसम्म खोल्न पाइनेछ भने फलफूल र तरकारी पसलहरु बिहान ५ बजेदेखि ८ बजेसम्म मात्र खोल्न पाइने छ । तरकारी (फलफूलदेखि बजार क्षेत्रका सम्पूर्ण पसलहरु शनिबार बन्द गर्नुपर्ने प्रशासनले निर्देशन दिएको छ ।
त्यस्तै जिल्लाभित्र सम्पूर्ण प्रकारका निजि तथा सार्वजनिक यात्रुवाहक सवारी साधनहरु अर्को सूचना नआएसम्म सञ्चालनमा रोक लगाइएको छ । कुनैपनि मेला, महोत्सव, जात्रा, ठूलो भेला, भीडभाड, सभा जुलुस र चार जनाभन्दा बढी समुह बनाएर एकै ठाउँमा जम्मा हुन पाइने छैन ।
प्रशासनले १२ वर्षमुनि र ६० वर्षमाथि र कुनैपनि गम्भीर किसिमको दिर्घरोगिलाई घरबाट बाहिर ननिस्कन विशेष अनुरोध समेत गरेको छ ।
