काठमाडौं– स्वास्थ्य तथा जनसंख्या मन्त्रालयले कोरोना संक्रमितको संख्या बढ्दै गएपछि स्वास्थ्य स्वयंमसेवक खटाउने भएको छ ।मन्त्रालयले कोभिड–१९ महामारीमा संक्रमितको उपचारमा संलग्न हुन इच्छुक चिकित्सक, नर्स, पारामेडिक्सलगायत स्वास्थ्यकर्मीहरुलाई तीन दिनभित्र स्वास्थ्य तथा जनसंख्या मन्त्रालयको वेवसाइटमार्फत आवेदन दिन भनेको हो ।
मन्त्रालयले अवकाशप्राप्त र अन्य स्वास्थ्यकर्मीलाई कोभिड–१९ महामारीमा खटिनका लागि स्वतःस्फूर्त आह्वान गरिएको मन्त्रालयका नीति योजना तथा अनुगमन महाशाखा प्रमुख डा. गुणराज लोहनीले जानकारी दिए । उनले भने ‘अहिले खुला आह्वान गरिएको र संक्रमित हुनेको क्षेत्र र संख्या हेरेर स्वयंमसेवक परिचालन गरिनेछ ।’
मन्त्रालयका प्रवक्ता डा. जागेश्वर गौतमले स्वास्थ्यकर्मीहरु संक्रमित हुने दर बढीरहेको र आम संक्रमितहरुको संख्या बढीरहेको सन्दर्भमा स्वयंमसेवक परिचालन गर्ने निर्णयअनुसार सार्वजनिक आह्वान गरिएको बताए । ‘यति नै संख्यामा स्वयंमसेवक परिचालन गर्ने भन्दा पनि अहिले आवेदकहरुको रोस्टर तयार गरेर आवश्यकमात्रामा परिचालन गरिनेछ,’ उनले भने ।
मन्त्रालयले मंगलबार सार्वजनिक सूचना जारी गर्दै मन्त्रालयको वेवसाइटमा रहेको फारम भरि तीन दिनभित्र अनलाइन आवेदन पेस गर्न भनेको छ ।
स्वयंमसेवकहरुलाई कोभिड–१९ रोगको उपचारका लागि अस्पताल तथा अन्य स्वास्थ्य संस्थाहरुको आइसोलेसन तथा क्वारेन्टाइनमा खटाइने मन्त्रालयले जारी गरेको सूचनामा उल्लेख छ ।
फर्म भर्न यहाँ क्लिक गर्नुहोस्ः
