काठमाडौं—थापाथलीस्थित नर्भिक इन्टरनेशल हस्पिटलले कोभिड—१९ का संक्रमित तथा शंकास्पद बिरामीसँग २४ घण्टाको २२ हजार रुपैयाँ लिने गरेको पाइएको छ । एक हप्ताअघिसम्म एक दिनको १२ हजार रुपैया लिने गरेको नर्भिकले सरकारले निजी अस्पताललाई पनि २० प्रतिशत बेड छुट्याएर कोभिड—१९ बिरामीको उपचार गर्न निर्देशन दिएपछि बेड चार्ज बढाएको हो ।
अस्पतालका कार्यकारी निर्देशक राजेन्द्रबहादुर सिंह कोभिड—१९ का बिरामीहरुको सुरक्षाका लागि पीपीईको शुल्क जोड्दा २२ हजार पुगेको बताए । ‘बेड शुल्क बढेको होइन्,’ उनले भने, ‘पीपीई चार्ज बढेको हो ।’ उनले विस्तृत के के सामाग्रीको बढेको हो भन्ने कुरा आफू बाहिर रहेका कारण भन्न नसक्ने बताए ।
नर्भिक अस्पतालले कोभिड बेड चार्ज भन्दैं ६ वटा क्याटागोरीमा बेडहरु वर्गीकरण गरेका छ । फिभर क्लिनिक वेड भनेर ६ हजार रुपैयाँ शुल्क तोकेको छ । त्यस्तै, सेमी कोभिड बेड भनेर ११ हजार रुपैयाँ शुल्क तोकिएको छ ।
नर्भिक अस्पताल तोकेको कोरोना बेडको शुल्क । जुन बिरामीका आफन्तहरुलाई उपब्ध गराइएको थियो ।
यस्तै, कोभिड स्वीट भनेर ३६ हजार रुपैयाँ शुल्क तोकिएको छ । कोभिड डिलक्स भनेर १८ हजार शुल्क तोकिएको छ । त्यस्तै, क्रिटिकल एसटिडी भनेर २२ हजार तोकिएको छ भने क्रिटिकल डिलक्स भनेर २७ हजार रुपैयाँ शुल्क तोकिएको छ ।
यसअघि कोभिड संक्रमित र शंकास्पद बिरामीलाई क्रिटिकल एसटीडीमा राखेर १२ हजार रुपैयाँमा प्रतिदिन सेवा दिइरहेको नर्भिक अस्पतालले एक हप्तादेखि पीपीई सेटको थप १० हजार रुपैयाँ भन्दैं २२ हजार रुपैयाँ लिन थालेको छ । नर्भिकको आइसोलेसनमा उपचार गराइरहेका एक कोभिड—१९ संक्रमितले हेल्थ आवाजसँग भने, ‘मलाई हिजो जुन तरिकाले उपचार भैरहेको थियो । आज पनि त्यही छ, तर दैनिक १० हजार रुपैयाँ शुल्क थपिदिएको छ ।’
पेटको उपचार गराउन १५ दिनअघि नर्भिक अस्पताल पुगेका एक बिरामीको कोरोना परीक्षण गर्दा पोजेटिभ आएपछि आइसोलेसन वार्डमा राखिएको थियो । सुरुमा उनीबाट क्रिटिकल एसटीडीमा राखेको दैनिक शुल्क १२ हजार रुपैयाँ लिइएको थियो । तर, सरकारले निजी अस्पतालमा समेत २० प्रतिशत बेड छुट्याएर कोरोना संक्रमितको उपचार गर्नुपर्ने निर्णयसँगै त्यसमा १० हजार शुल्क वृद्धि गरी दैनिक २२ हजार रुपैयाँ लिन थालेको हो ।
सरकारले कोभिड—१९ का लक्षणबिहीन बिरामीलाई घरमै बसे स्वास्थ्यकर्मी खर्च बापत दैनिक २ सय रुपैयाँ उपलब्ध गराउने भनेको छ । यदि अस्पतालमा भर्ना भए सामान्य लक्षण भएका र नभएकाको ३ हजार ५ सय रुपैयाँ शोध भर्ना गर्ने भनेको छ । अस्पताल उपचार गर्नुपर्ने अवस्था भएका बिरामीहरुका लागि दैनिक ७ हजार रुपैयाँ सरकारले शोध भर्ना गर्छ । संक्रमित भएर गम्भीर भएमा आईसीयु तथा भेन्टिलेटरमा उपचार गर्नुपर्ने बिरामीका लागि १५ हजार रुपैयाँ शोध भर्ना गर्ने सरकारको निर्णय छ ।
सरकारले गर्ने शोध भर्नाकै आधारमा निजी अस्पतालहरुले पनि शुल्क लिनुपर्ने मन्त्रालयका कोभिड इन्सिडेन्ट कमाण्ड सिष्टमका प्रमुख डा. गुणराज लोहनी बताउँछन् । ‘कोभिड उपचारमा निजी र सरकारीले छुट्टै शुल्क लिने भन्ने हुन्न्,’ डा. लोहनीले हेल्थआवाजसँग भने, ‘सरकारले तोकेअनुसार नै शुल्क लिनुपर्छ । बढी लिनेलाई कारवाही हुन्छ ।’
हेल्थ आवाजसँग सम्पर्कमा आएका नर्भिकमा उपचारमा गराइरहेका ती संक्रमित आफू सामान्य अवस्थामा रहेको बताए । ‘आजको दिनसम्म मलाई अक्सिजन पनि दिनु परेको छैन्,’ उनले भने, ‘रिपोर्ट पोजेटिभ आएको हुँदा अरु चेकजाँच पनि भएको छैन । किन २२ हजार रुपैयाँ लिइरहेको छ अच्चममा परेको छु ।’ काठमाडौं उपत्यका बाहिरबाट आएका ती बिरामीले आफूले सुरुमा सरकारी अस्पताल गएको तर बेड नपाएपछि नर्भिक आएको बताए ।
