सुर्खेत– कर्णाली प्रदेशका मुख्यमन्त्री महेन्द्रबहादुर शाहीले नागरिकहरुलाई अनिवार्य मास्क प्रयोग गर्न लगाउन प्रदेशका सबै प्रमुख जिल्ला अधिकारीहरुलाई निर्देशन दिएका छन् ।
कोरोना भाइरसको रोकथाम तथा नियन्त्रणका लागि स्वास्थ्य सुरक्षाका मापदण्ड पूरा गर्नका लागि सबै नागरिकहरुलाई अनिवार्य मास्क प्रयोग गर्न लगाउन प्रमुख जिल्ला अधिकारीहरुलाई निर्देशन दिएका हुन् । शुक्रबार प्रमुख जिल्ला अधिकारीसँगको भर्चुअल बैठकमा मुख्यमन्त्रीले कोरोना संक्रमण रोक्न आवश्यक सुरक्षा सतर्कता अपाउन सुझाव दिए ।
जिल्लाको अवस्था बुझ्न र प्रदेश सरकारबाट हुन सक्ने सहयोग बुझ्न बैठक बोलाइएको शाहीको भनाई थियो । मुख्यमन्त्री शाहीले कोरोना रोकथामका लागि आवश्यक सबै कदम चाल्न प्रमुख जिल्ला अधिकारीहरुलाई निर्देशन दिएका छन्् । नागरिकको जिउधनको सुरक्षा गर्ने दायित्व राज्यको भएको बताउँदै लक्षणसहितको संक्रमण बढेकोले सबै जिल्लामा उच्च सतर्कता अपनाउनु पर्ने उनले बताए ।
जिल्लामा हुने मेला, महोत्सव, दलहरुका कार्यक्रम बैठक र भिडभाड हुने गतिविधि रोक्न समेत उनले निर्देशन दिएका छन् । सबै जिल्लालाई स्थानीय तह र प्रदेश सरकारसँग समन्वय गरेर हरेक नागरिकलाई अनिवार्य मास्क प्रयोग गर्ने व्यवस्था मिलाउन सुझाव दिए । प्रदेश सरकारले जिल्ला अस्पतालहरुमा अक्सिजन, कम्तिमा एउटा भेन्टिलेटर र पाँचदेखि सातवटा आईसियु बेड व्यवस्था गर्न लागेको समेत उनले बताए ।
साथै वर्षायामका कारण बाढी, पहिरोजस्ता प्राकृतिक विपदवाट क्षति बढेको तर्फ चिन्ता व्यक्त गर्दै मुख्यमन्त्री शाहीले उद्धार, उपचार, राहतलाई प्रभावकारी बनाउन आवश्यक समन्वय गरी काम गर्न अनुरोध गरे ।
