विराटनगर– समुदायस्तरमा कोरोना भाइरस फैलिएपछि निषेध आदेशको पहिलो दिन शनिबार प्रदेश १ को राजधानी विराटनगर सुनसान देखिएको छ । स्थानीय प्रशासनले निषेध आदेश जारी गरेपछि विराटनगरको सडक र बजार क्षेत्र सुनसान देखिएको हो ।
सडकमा प्रहरी परिचालन गरिएको छ । फाटफुट सडकमा देखिएका व्यक्तिलाइ प्रहरीले सोधीखोजी गर्छन् । अत्याआश्वयक बाहेकका अन्य साधन र अनावश्यक मानिसको आवातजावतलाई कडाई गरिएको मोरङ प्रहरीका प्रवक्ता डिएसपी मानबहादुर राईले जानकारी दिए ।
बिहान ६ बजेदेखि ९ बजेसम्म अत्यावश्यक सामान खरिद गर्न दिइएको भएपनि त्यस पश्चात् कडाइ गरिएको छ । सामुदायस्तरमा कोरोना संक्रमणको जोखिम बढेपछि नागरिकलाई घरबाहिर ननिस्कन अनुरोध गर्दा पनि अटेर गरेको कारण निषेध आदेशलाई कडाइका साथ कार्यान्वयन गरिने स्थानीय प्रशासनले जनाएको छ ।
विराटनगर महानगरपालिका भित्र ९ जनाको मृत्यु भइसेको छ भने शुक्रबारसम्म ७ सय ७७ जना संक्रमित पुगेका छन् । जिल्ला प्रशासन कार्यालय मोरङले विराटनगर महानगरपालिका, रंगेली नगरपालिकाको ४, ५, ६, ७ कटहरी गाउँपालिकाको १,२,३,४ र ५, र बुढीगंगा गाउँपालिकाको १,२, ३, ४ नम्बर वडामा भदौ १० गते राती १२ बजेसम्मको लागि निषेध आदेश जारी गरेको छ ।
तस्वीरहरूः अनिल श्रेष्ठ
