बुटवल—लुम्बिनी प्रादेशिक कोरोना विशेष अस्पताल बुटवल धागो कारखानामा भेन्टिलेटरको सहयोगमा उपचार गरिरहेका २ जनाको मृत्यु भएको छ । कोरोना लक्षण देखिएर अस्पतालमा भर्ना गरिएका कपिलवस्तुका २५ र ४२ वर्षीय दुई पुरुषको मंगलबार राती मृत्यु भएको लुम्बिनी प्रादेशिक अस्पतालका मेडिकल सुपरिटेन्डेन्ट डा. राजेन्द्र खनालले जनाकारी दिए ।
कोभिड—१९ को लक्षणसहित आएका कपिलवस्तुका ४२ वर्षीय पुरुष साउन २५ गते भर्ना भएका थिए । उनको सोही दिन नैै पिसीआर परीक्षणमा कोरोना पोजेटिभ देखिएको थियो । सोही दिनबाट नै उनलाई भेन्टिलेटरमा राखी उपचार भइरहेको थियो ।
त्यस्तै, कपिलवस्तुकै २५ वर्षीय अर्का युवाको पनि गए राति नै मृत्यु भएको छ । मंगलबार अस्पतालमा उपचारका लागि आएका उनीमा कोभिडको लक्षण देखिएको थियो । कोरोनाको लक्षण देखिना साथ कोरोना विशेष अस्पतालमा भेन्टिलेटरको सपोर्टमा राखिएको डा. खनालले बताए ।
हिजो स्वाब संकलन गरी कोभिड–१९ परीक्षणका लागि प्रयोगशाला पठाइएकोमा रिपोर्ट आएको छैन । उनीहरुमध्ये एकजना तौलिहवाका हुन् भने अर्का कृष्णनगरका हुन् ।
धरानस्थित विपी कोइराला स्वास्थ्य विज्ञान प्रतिष्ठानमा मोरङ बुढीगंगा घर भएका एक जना कोरोना संक्रमितको उपचारको क्रममा मृत्यु भएको छ । मोरङको बूढीगंगा गाउँपालिका –२ घर भएका ५५ वर्षीय पुरुषको उपचारका क्रममा बुधबार विहान मृत्यु भएको हो ।
एक साताअघि प्रतिष्ठानमा भर्ना भएका संक्रमितको उपचारको क्रममा मृत्यु भएको प्रतिष्ठानका प्रवक्ता डा. निदेश सापकोटाले बताए । आइसोलेसनमा उपचाररत रहेका संक्रमितको मृत्यु भएको उनले बताए । मृतकको शव अहिले आइसोलेसनमै रहेको छ । शव व्यवस्थापनका लागि सेनाको विशेष टोलीको जिम्मा लगाउने तयारी भइरहेको प्रतिष्ठानले जनाएको छ ।
यस्तै बुधबार पाटन अस्पतालमा एक २८ वर्षीय कोरोना संक्रमित युवतीको मृत्यु भएको छ । जनकपुरकी ती महिला १८ साउनमा पाटन अस्पतालमा भर्ना भएकी थिइन् । जिल्ला जनस्वास्थ्य कार्यलय ललितपुरका प्रमुख डा. खगेश्वर गेलालले आईसीयुमा उपचाररत कोरोना संक्रमितको मृत्यु भएको पुष्टि गरे ।
