बुटवल—लुम्बिनी प्रादेशिक अस्पतालअन्तर्गतको कोरोना विशेष अस्पताल धागो कारखानाका लागि ‘रोबर्ट’ प्रदान गरिएको छ । अस्पतालमा रहेका कोभिड—१९ का बिरामीहरुलाई औषधि तथा अन्य आवश्यक सामाग्री प्रदान गर्ने प्रयोजनका लागि भन्दै रोबर्ट प्रदान गरिएको हो ।
कोरोना विशेष अस्पतालमा रहेका संक्रमितहरुलाई आवश्यकताअनुसार औषधि पु¥याउन सो रोबर्ट बुधबार अस्पतालका फोकल पर्सन डा. सुदर्शन थापालाई हस्तान्तरण गरिएको छ । युएनडिपीले उपलव्ध गराएको रोबर्टका माध्यमबाट कोभिड—१९ का बिरामीहरुलाई औषधि प्रदान गर्न सकिनेछ ।
नर्सको काम रोबर्टले गर्न सक्ने दावीसहित सो रोवर्टको नाम ‘सिस्टर रोबर्ट’ दिइएको छ । रोबोट रोबिक एसोसिएसन नेपालले २ लाख लागतमा तयार गरेको हो ।
युएनडिपीका प्रदेश संयोजक सुदीप अर्याल र प्रदेश सामाजिक विकास मन्त्रालयका सचिव डा. गोपी खनालले रोबर्ट अस्पताललाई हस्तान्तरण गर्दै जोखिम कम गर्न सघाउ पुग्ने विश्वास व्यक्त गरे । संक्रमितसँंग हेलमेल भइराख्नुपर्ने नर्सको सुविधाका लागि मात्र नभएर उनीहरुलाई संक्रमणबाट जोगाउन रोबर्ट उपलब्ध गराएको युएनडिपीका प्रदेश संयोजक अर्यालले बताए ।
रोबर्ट रिमोट कन्ट्रोलबाट चल्छ । रोबर्टले औषधि, खानेकुरा, लुगा बिरामीसम्म पु¥याउन सक्छ । रोबर्टमा भिडियोबाट ५ सय मिटर परसम्मको भिडियो लिन सकिन्छ । भिडियो क्यामेराका माध्यमबाट बिरामीसँग लाइभ हेर्न सकिने एसोसिएसनका अध्यक्ष विकास गुरुङले बताए । रोबर्टमा ट्याब्लेट प्रयोग गरिएकाले नर्स र बिरामीबीच कुरा गर्न सकिने उनले बताए ।
युएनडिपीले काठमाडौंको टेकु अस्पतालमा पनि ‘सिष्टर रोबर्ट’ उपलब्ध गराएको छ । कोरोना विशेष अस्पताल बुटवलका फोकल पर्सन डा. सुदर्शन थापाले ‘सिष्टर रोबर्ट’ले नर्सहरुलाई कोरोना संक्रमणको जोखिमबाट बचाउन सहयोग पुग्ने बताए । केही व्यवस्थापनका काम गरेर रोबर्ट प्रयोगमा ल्याउने उनले जानकारी दिए ।
