विराटनगर—औषधि व्यवस्था विभागले गरेको निर्णयलाई लत्याउँदै पैसाको लोभमा फार्मेसी संचालकहरूले औषधिको चरम दुरूपयोग गर्दै अनुचित प्रयोग गरेको एक दर्जन औषधि पसल निलम्बनमा परेका छन् । औषधि व्यवस्था विभाग विराटनगरले आर्थिक वर्ष २०७६/०७७ मा विराटनगरसहितका १२ वटा औषधि फार्मेसीलाई निलम्बन गरेको हो ।
निलम्बन गरेको औषधि पसलहरू प्रदेश १ तीन जिल्ला र प्रदेश २ का दुई जिल्लाका छन् । औषधि व्यवस्था विभाग विराटनगरको कार्यक्षेत्र १४ जिल्ला रहेको प्रदेश १ र २ नम्बर प्रदेशको सिरहा र सप्तरी जिल्ला पर्दछ ।
यसरी निलम्बनमा पर्ने मोरङको पाँच वटा फार्मेसी रहेका छन् । विराटनगर– ९ न्यूरो हस्पिटल अगाडि विकास मण्डलले संचालन गरेको ‘हाम्रो फ्रेन्डसीप फार्मेसी’लाई औषधि व्यवस्था विभागले निलम्बन गरेको छ । हाम्रो फ्रेन्डसीप फार्मेसीले मानव स्वास्थ्यमाथि खेलवाड गर्दै म्याद सकिएको औषधि बिक्री वितरण गरेको आरोपमा संचालक मण्डललाई पक्राउ गरी पसल गत चैत १९ गते निलम्बन गरेको थियो । उक्त फार्मेसी अहिले पनि बन्द छ । पक्राउ परेका मण्डल केही दिन अगाडि मोरङ अदालतले ३ लाख रूपैयाँ धरौटीमा छोडन आदेश दिएको थियो । अदालतले तोकेको धरौटी रकम बुझाएका उनी रिहा भएका छन् । औषधि व्यवस्था विभाग विराटनगरको अनुसार मण्डलले १५ प्रकारका विभिन्न औषधी म्याद सकिएको विक्री वितरण गर्दै आएको अवस्थामा अनुगमन टोलीले फेला पारेको थियो ।
यस्तै मोरङको मिक्लाजुङ गाउँपालिकाको मधुमल्लामा रहेको राय मेडिकल हल एक महिनादेखि निलम्बनमा परेको छ । उक्त मेडिकल हलले म्याद गुज्रेकेको र डाक्टरको पुर्जा बिना बेच्न नपाइने बिभिन्न प्रकारका औषधिहरु विक्री वितरण गरेको पाइएपछि गत चैत ११ गते सिल गरिएको थियो । औषधि व्यवस्था विभाग विराटनगरले राय मेडिकल हललाई चैत ११ देखि गत जेठ २२ गतेसम्म निलम्बन गरेको हो ।
यस्तै, निलम्बनमा पर्ने फार्मेसीहरुमा विराटनगरको सविन फार्मेसी, सुनिधा फार्मेसी, वी केयर फार्मेसी रहेको छ । यस्तै, सप्तरीको सिद्ध मेडिकल हल, सुनसरीको धरान उपमहानगरपालिका—१८ स्थित महावीर मेडिकल हल, सिराहको गोलबजारको प्रतियुष मेडिसिन, मोरङको रंगेली नगरपालिकाको इशान्त फार्मेसी र सिराहको एहसान आयुर्वेदिक मेडिकल निलम्बनमा परेको औषधि व्यवस्था विभाग विराटनगरका प्रमुख सन्जीव शर्मा कट्टेलले जानकारी दिए । निलम्बनमा परेका औषधि पसलहरू एक सातादेखि एक महिना भन्दा बढी रहेको छ ।
औषधि व्यवस्था विभागको नियम र निर्देशन पालना नगर्ने पसल कारवाहीको दायरमा आएको उनकाले बताए । कारवाहीमा पर्ने अधिकांश औषधि पसलहरू म्याद सकिएको औषधि विक्री वितरण गर्ने, पसल दर्ता नभएको, औषधि व्यवस्था विभागमा दर्ता नभएको औषधिको संचय गरी विक्री वितरण गर्ने पसलहरू छन् । आर्थिक वर्षमा ४ सय ९२ वटा पसल अनुगमन गरेर मापदण्ड पूरा नगरेका ३६ वटा औषधि पसल बन्द गरिएको औषधि व्यवस्था विभाग विराटनगरको अभिलेखमा उल्लेख छ ।
औषधि व्यवस्था विभागले गरेको निर्णयलाई लत्याउँदै पैसाको लोभमा फार्मेसी संचालकहरूले औषधिको चरम दुरूपयोग गर्दै अनुचित प्रयोग गर्ने ७ वटा मुद्दा अदालतमा दायर गरेको छ । फार्मेसी संचालकहरू कमाउ धन्दामा लागेर कतिसम्मको बदमासी गरेको पाइएको छ भने चिकित्सकको ‘प्रेस्क्रिीप्सन’ बेगर लागु औषध प्रयोगकर्ताहरूलाई समेत औषधि विक्री वितरण गर्ने ७ जना फार्मेसी संचालक विरूद्ध आर्थिक वर्षमा अदालतमा अभियोग दर्ता गरिएको छ । प्रदेश १ को विभिन्न जिल्लाहरूमा फार्मेसीहरूले लागत मूल्यभन्दा तीन गुणा बढी मुल्य लिएर औषधिको अनुचित प्रयोग बढेको छ । औषधिको चरम दुरूपयोग गर्दै अनुचित प्रयोग बढाएका हुन् ।
आर्थिक वर्षमा १३ वटा औषधि पसललाई सचेत गराएको छ भने ६० वटा पसललाई तारेखमा राखेर विभागले छोडेको छ । आर्थिक वर्षमा ३ सय ४५ वटा औषधि पसल विभागमा दर्ता भएका छन् । आर्थिक वर्षमा ३५ लाख ७३ हजार ४ सय ६३ रुपैयाँ राजस्व संकलन गरेको विभागको तथ्यांकमा देखिन्छ ।
