सुर्खेत– कर्णाली प्रदेशमा लकडाउन खुलेसँगै कोरोना भाइरस संक्रमितको संख्या बढ्न थालेको छ । असार अन्तिमदेखि साउन पहिलो सातासम्म घट्दै गएको संक्रमणको ग्राफ उकालो लाग्न थालेको हो ।
जसले गर्दा अहिले जोखिमसँगै संक्रमणको दर पनि बढ्दै गएको छ । कर्णाली प्रदेशमा सोमबार मात्र थप ३१ जनामा कोरोना संक्रमण देखिएको छ ।
सामाजिक विकास मन्त्रालय कर्णाली प्रदेशले दिएको जानकारी अनुसार प्रदेश अस्पताल सुर्खेत, चौरजहारी अस्पताल रूकुम र दैलेख अस्पतालमा गरिएको पिसिआर परिक्षणमा सोमबार दैलेखका २८ जना, सल्यानका २ जना र सुर्खेतका १ जनामा कोरोना संक्रमण पुष्टि भएको हो । यो सँगै कर्णाली प्रदेशमा कोरोना संक्रमितको संख्या १ हजार ९ सय १० पुगेको छ ।
जसमध्ये १ हजार ६ सय ५८ जना निको भएर घर फर्किसकेका छन् भने सक्रिय २ सय ४६ जना संक्रमित आइसोलेसनमा उपचाररत रहेको मन्त्रालयले जनाएको छ ।
कर्णालीमा सोमबार १४ जना संक्रमित डिस्चार्ज भएर घर फर्केका छन् । हालसम्म कोरोना संक्रमणका कारण कर्णाली प्रदेशमा ६ जनाको ज्यान गइसकेको छ ।
जेठ ५ गते पहिलो पटक संक्रमण पुष्टि भएको कर्णालीमा जेठमा मात्र ९ सय ५७ जनामा कोरोना संक्रमण पुष्टि भएको थियो ।
असार महिनामा भने संक्रमणदर घटेको थियो। असारमा ७ सय ५७ जना संक्रमित थपिएका थिए । असार मसान्तदेखि साउन पहिलो सातासम्मको अवधिमा भने संक्रमण केही घटेको थियो ।
त्यसयता भने दिन प्रतिदिन ठूलो संख्यामा संक्रमित थपिने क्रम जारी छ । साउन ७ गतेबाट लकडाउन खुलेसँगै संक्रमितहरूको संख्या बढ्न थालेको हो । साउन १ गते यता कर्णालीमा एक सय ८२ जनामा संक्रमण देखिएको छ ।
प्रदेश स्वास्थ्य सेवा निर्देशनालयका अनुसार साउन ६ गते प्रदेशभर १२ जनामा कोरोना संक्रमण देखिएकोमा ७ गते २२ जना संक्रमित थपिएका थिए । त्यस्तै ८ गते ३० जना, ९ गते ११ जना १० गते २७ जना ११ गते २८ र १२ गते ३१ जनामा कोरोना संक्रमण पुष्टि भएको हो ।
संक्रमणको सुरुवाती चरणमा भारतबाट आउनेहरूको संख्या धेरै भएपनि हिजोआज पुष्टि एका संक्रमित अधिकांश समुदायस्तरका भएको प्रदेश स्वाथ्यसेवा निर्देशनालयले जनाएको छ ।
समुदायमा गएर नखोज्दै धेरै स्थानीय संक्रमित भेटिनु खतराको संकेत भएको चिकित्सकहरू बताउँछन् । कर्णालीमा पछिल्ला दिनहरूमा भेटिएका अधिकांशको कोरोना संक्रमितको अहिलेसम्म संक्रमणको स्रोत भने भेटिएको छैन ।
जसकारण स्थानीयमा कहाँबाट कसरी संक्रमण सर्यो भन्ने सवाल उठ्न थालेको छ । अधिकांशको संक्रमण स्रोत नभेटिनुले पनि समुदायमा संक्रमण व्यापक भइसकेको अड्कल काट्न सकिने जानकारहरु बताउछन् ।
केहिदिन पहिले कर्णाली प्रदेश सभा एक सदस्यको पिसीआर परीक्षण गर्दा कोरोना संक्रमण देखियो । दैनिकजसो धेरै व्यक्तिको सम्पर्कमा रहने उनलाई संक्रमण देखिएपछि अन्य प्रदेश सभा सदस्य, सचिवालयका कर्मचारी, चालक, पत्रकार गरि झण्डै तीन सय जनाको पीसीआर परीक्षण भयो ।
तर, उनको सम्पर्कमा रहेका कसैमा पनि संक्रमण देखिएन । हाल उनी कोरोना संक्रमणमुक्त भइसकेका छन् ।
लकडाउन खुलेसँगै मानिसहरूले सार्वजनिक स्थानमा सावधानी नअपनाएका कारण कोरोना संक्रमण बढ्ने खतरा रहेको कर्णाली प्रदेश अस्पतालका कोरोना फोकल पर्सन डा. प्रदीप न्यौपाने बताउँछन् ।
