काठमाडौं– कोभिड–१९ को पिसिआर परीक्षण हुने भन्दै अवैध शुल्क लिने तीन अस्पतालमाथिको छानविन प्रतिवेदन स्वास्थ्य तथा जनसंख्या मन्त्रालयले लुकाएको छ । राजधानीका ठूला भनिएका ह्याम्स अस्पताल, ग्राण्डी अन्तराष्ट्रिय अस्पताल र नेपाल मेडिकल कलेज शिक्षण अस्पतालमाथि गरिएको छानविन प्रतिवेदन मन्त्रालयले लुकाएको हो ।
यी तीन अस्पतालले पिसिआर परिक्षणको नाममा अवैध शुल्क लिने गरेको खुलेपछि मन्त्रालयले छानविनका लागि समिति गठन गरेको थियो । सो समितिले छानविन गरी प्रतिवेदन बुझाएको एक हप्ता बितिसक्दा पनि मन्त्रालयले प्रतिवेदन सार्वजनिक गरेको छैन र कुनै प्रक्रिया पनि अगाडि बढाएको छैन ।
तीन अस्पतालले पिसिआर परिक्षण गर्ने नाममा अवैध रुपमा शुल्क लिने गरेको २६ असारमा हेल्थआवाजले समाचार प्रकाशित गरेको थियो । त्यसको लगत्तै दुई दिनपछि सचिवस्तरीय निर्णय गरी मन्त्रालयका उपसचिव पानबहादुर क्षेत्रीको संयोजकत्वमा तीन सदस्यीय छानविन समिति गठन गरेको थियो ।
सो समितिले छानविन गरी मन्त्रालयका सचिव लक्ष्मण अर्याललाई बुझाएको प्रतिवेदनमाथि कुनै प्रक्रिया अघि नबढेको मन्त्रालय स्रोतले जनाएको छ ।
छानविन समितिका संयोजक क्षेत्रीले एकहप्ता अघि नै प्रतिवेदन सचिवलाई बुझाइसकेको बताए । ‘हामीले एक हप्ताअघि नै सचिवलाई प्रतिवेदन बुझाईसकेका छौं,’ उनले हेल्थ आवाजसँग भने, ‘हामीले हाम्रो काम सकिसकेका छौं, सचिवज्यूले अध्ययन गर्दै हुनुहुन्छ होला ।’
