काठमाडौं—ललितपुरको धापाखेलस्थित सुमेरु अस्पतालले पहिलो पटक सफल मिर्गौला प्रत्यारोपण गरेको छ । अस्पतालले गोरखाका विकास गुरुङ र रामेछापका सुकरानी मोक्तानको सफल मिर्गौला प्रत्यारोपण गरेको अस्पतालका कार्यकारी निर्देशक प्रा.डा. ऋषि काफ्लेले जानकारी दिए ।
भावि योजना सम्बन्धी जानकारी दिन बिहीबार अस्पतालले आयोजना गरेको कार्यक्रममा उक्त जानकारी दिइएको हो । अस्पतालले संस्थागत समाजिक उत्तरदायित्व अन्तर्गत २ जनालाई निःशुल्क मिर्गौला प्रत्यारोपण जानकारी दिएको छ ।
१२ जना डाक्टरहरुको टोलीले गुरुङ र मोक्तानमा मिर्गौला प्रत्यारोपण गरेको हो । प्रा.डा. काफ्ले नेतृत्वमा भएको प्रत्यारोपणमा सर्जनका रुपमा डा.वीरेन्द्र यादव, डा.किरण श्रेष्ठ, डा. राकेश बर्मा, डा. डिभी कार्की, डा. वेस अन्सारी रहेका थिए । नेफ्रोलोजिष्टको रुपमा डा. राजेन्द्रकुमार अग्रवाल, डा. नवीन बस्नेत, डा. वर्षा श्रेष्ठ, डा. सन्तोष गुरुङ, डा. सन्जीव आचार्य थिए भने प्रत्यारोपण एनेस्थेसिस्टमा डा. महालक्ष्मी देउजा र डा. अनिल ओझाले भूमिका निभाएका थिए ।
उक्त कार्यक्रममा स्वास्थ्य तथा जनसंख्या राज्यमन्त्री डा. सुरेन्द्र यादवले मिर्गौला प्रत्यारोपणमा आफूहरुले अस्पताललाई प्रोत्साह गर्ने बताए । सो अवसरमा उनले प्रत्यारोपण गर्ने टोलीसहित प्रत्यारोपण गरिएका विरामीलाई पनि सम्मान गरेका थिए ।
प्रा.डा. काफ्लेले सरकारले दिने रकम सहज रुपमा उपलब्ध गर्न कठिनाई रहेको बताए । उनले सरकारले घोषणा गरेको ४ लाख रुपैयाँ र प्रत्यारोपणपछि खाने औषधि निःशुल्क र सहज उपलब्ध गराउनुपर्नेमा जोड दिए ।
साथै, अस्पतालले राज्यद्वारा निर्धारित शुल्कभित्र रही सर्वशुलभ ढंले प्रत्यारोपण गर्ने प्रतिबद्धता जनाएको छ । यस्तै, ब्लड ग्रुप म्याचिङ्ग नहुने बिरामीहरुको मिर्गौला प्रत्यारोपणको लागि प्लाज्मा फेरोसिस मेशिन जडान र सुविधा सम्पन्न एच.एल.ए. ल्याव समेत संचालन गर्ने योजना रहेको अस्पताल ब्यवस्थापनले जनाएको छ । अन्तर्राष्ट्रियस्तरको सुविधा सम्पन्न २०० शैय्याको किड्नी अस्पताल, सबै प्रदेशमा मृगौला रोग सम्वन्धी सेवा केन्द्र स्थापना गर्ने योजना पनि अस्पतालको छ । हाल अस्पतालले विभिन्न सेवाहरु प्रदान गर्दै आएको छ ।
