जुम्ला– जुम्लास्थित हिमा गाउँपालिकाको स्वास्थ्य शाखाले परिवार नियोजनको स्थायी बन्ध्याकरण शिविर सञ्चालनमा २५ जना पुरुषको भ्यासेक्टोमी गरेको छ । कालिका खेतु प्राथमिक स्वास्थ्य केन्द्रमा सञ्चालित दुई दिने शिविरमा सन्तानको रहर पुगेका पुरुषहरूको स्थायी बन्ध्याकरण गरिएको हो ।
धेरै सन्तान जन्माएर शिक्षा, स्वास्थ्य र पालनपोषणमा पनि नागरिकलाई समस्या हुने भएकोले बेला–बेला स्थायी पुरुष बन्ध्याकरणका शिविर सञ्चालन गर्दै आएको गाउँपालिका अध्यक्ष रजबहादुर शाहीले बताए ।
गाउँपालिकाद्धारा बड्की स्वास्थ्य चौकी अनुगमन
गाउँपालिकाले बड्की स्वास्थ्य चौकीको अनुगमन गरेको छ । स्वास्थ्य सेवाका विषयमा जानकारी लिन गाउँपालिकाका प्रमुख प्रशासकीय अधिकृत टोपवहादुर बुढा र स्वास्थ्य शाखा प्रमुख रतन रावत लगायतको टोलीले अनुगमन गरेको हो ।
अनुगमनका क्रममा प्रमुख प्रशासकीय अधिकृत बुढाले नियमित स्वास्थ्यकर्मीलाई नागरिकको सेवामा सहभागी हुन निर्देशन दिए । गाउँमा रहेको स्वास्थ्य चौकीमा सेवा लिन आउने नागरिकको चाप हुने भएकाले सन्तुष्ट हुने गरी सेवा दिन निर्देशन दिइएको छ ।
घरमै हुने सुत्केरी दरलाई कम गर्दै सबैलाई स्वास्थ्य संस्थामा सुरक्षित प्रसुति गराउने वातावारण बनाउन उनले आग्रह गरे । अहिले पनि कतिपय महिलाहरू घरमै सुत्केरी हुने गरेको स्वास्थ्य चौकीकि अनमी मालिका आचार्यले बताइन् ।
‘गर्भवती महिलाहरूलाई स्वास्थ्य संस्थामै सुत्केरी हुन आग्रह गरेका छौं,’ उनी भन्छिन्, ‘तैपनि कतिपय महिलाहरू घरमै सुत्केरी हुन्छन् ।’
घरपरिवारले स्वास्थ्य संस्था सम्म नल्याइदिनु, बाटो सहज नहुनु र हिउँदको सिजनमा चिसो हुने भएकाले महिलाहरु घरमै सुत्केरी हुने गरेको स्वास्थ्य चौकीका इन्चार्ज प्रकाश आचार्य बताए । ‘घरमै हुने सुत्केरी दरलाई न्युनिकरण गर्नको लागि स्वास्थ्य शिक्षा कार्यक्रम संचालन गरिने छ,’ उनले भने ।
गत साउनदेखि हालसम्म ४१ जना स्वास्थ्य संस्थामा आएर सुत्केरी भएको बड्की स्वास्थ्य चौकीको रेकर्डमा छ । स्वास्थ्य संस्थामा सुत्केरी हुने सबैले यातायात खर्च बापत ३ हजार र चार पटक नियमित गर्भजाँच गरेकालाई ८ सय रुपैयाँ दिने गरिएको आचार्यले जानकारी दिए ।
