वीरगन्ज—वीरगन्जमा देखिएका नयाँ कोरोना संक्रमितहरुमा लक्षण देखिन थालेको छ । पछिल्लो समय संक्रमित भएर अस्पतालको आइसोलेसनमा रहेका १८ जनामध्ये ५० प्रतिशतमा कोभिड—१९ का कुनै न कुनै लक्षण देखिएको चिकित्सकले बताएका छन् ।
नारायणी अस्पतालका कोभिड—१९ व्यवस्थापन संयोजक समेत रहेका डा. उदय सिंहले नयाँ संक्रमितमध्ये झण्डै ५० प्रतिशतमा कोभिड—१९ को लक्षण देखिएको जानकारी दिए ।
‘पहिले ९० प्रतिशत लक्षणबिहीन संक्रमिथत थिए,’ उनले भने, ‘पछिल्लो समय संक्रमित देखिएकाहरुमा लक्षण पनि देखिएको छ । अब उच्च सतर्कता अपनाउने बेला आएको छ ।’
नारायणी अस्पतालमा हाल १८ जना नयाँ संक्रमित छन् । तीमध्ये अधिकांशको बाहिर गएको अथवा बाहिरबाट आएका मानिसहरुसँगको सम्पर्क छैन् ।
लक्षणमा ज्वरो आउने, खोकी लाग्ने, जिउ दुख्ने र आलस्यता आउने जस्ता समस्या देखिएको डा. सिंहले बताए ।
