चितवन–कोरोना भाइरस (कोभिड—१९) संक्रमणको उच्च जोखिम नियन्त्रणका लागि भन्दै निक्कै तामझामका साथ ७२ घण्टामै निर्माण गरिएको चितवनस्थित भरतपुरमा रहेको कोरोना विशेष (अस्थायी) अस्पताल मंगलबारदेखि बन्द भएको छ । भरतपुर अस्पतालले मंगलबार एक विज्ञप्ति जारी गर्दै कोरोना अस्पताल बन्द गरिएको जानकारी दिएको हो ।
अस्पतालका मेडिकल सुपरिटेण्डेन्ट डा. श्रीराम तिवारीद्वारा जारी विज्ञप्तीमा सुरक्षाको दृष्टिकोणले उक्त अस्पताललाई पूर्ण रुपमा निर्मुलीकरण गरिने अस्पतालले जनाएको छ । हालसम्म कोरोना विशेष (अस्थायी) अस्पतालबाट शनिबार र आइतबार गरी १८ जना पोजेटिभ बिरामीलाई भरतपुर अस्पतालमा स्थानान्तरण गरी उक्त कोरोना विशेष (अस्थायी) अस्पताल बन्द गरिने जनाएको छ । तर, विज्ञप्तीमा सधैंका लागि बन्द गर्नुपर्ने कारण भने खुलाइएको छैन ।
भरतपुर महानगरपालिकाको पहलमा निर्माण थालिएको कोरोना विशेष अस्थायी अस्पताल ब्यवस्थापन पक्ष कमजोर हुनुका साथै विभिन्न विवादमा तानिदैं आएको थियो ।
सामाग्री चोरी प्रकरण
झन्डै एक महिना अगाडि कोरोना विशेष अस्थायी अस्पतालमा रहेको लाखौं मूल्य बराबरको स्वास्थ्य उपकरणसंँगै अन्य सामग्रीहरु अस्पतालकै कर्मचारीहरुले चोरी गरेर लगेको सीसीटिभी फुटेज बाहिरिएको थियो ।
कोरोना संक्रमितहरुको उपचारका लागि भरतपुर महानगरपालिकाले बनाएको कोरोना अस्थायी अस्पतालका सरसामान राती कर्मचारीहरूले पोको पारेर लगेको भिडियो सार्वजनिक भएपछि यसले देशभर नै तरंग ल्याएको थियो । सोही घटनालाई लिएर व्यापक अनियमितता भएको आशंकामा अख्तियार दुरुपयोग अनुसन्धान आयोगको क्षेत्रीय कार्यालय हेटौंडाले समेत अस्पताल परिसरमै छापा मारेर त्यहाँका महत्वपूर्ण कागजातपत्र नियन्त्रणमा लिएर अनुसन्धान गरिरहेको छ ।
चोरीमा कर्मचारीकै संलग्नता !
कोरोना विशेष अस्थायी अस्पतालमा भएको चोरी प्रकरणमा अस्पतालका लेखापाल फणिन्द्र खनाल, भरतपुर अस्पतालका कर्मचारी सञ्जय बराल र महानगरपालिका स्वास्थ्य शाखाका अधिकृत सूर्य तिवारीले अस्पतालको स्टोरबाट सामान बाहिर निकालेको भिडियोमा प्रष्ट देखिएको थियो ।
चोरीमा संलग्नता रहेका भनिएका खनाल नेपाल निजामती कर्मचारी संगठन चितवनका जिल्ला अध्यक्ष हुन् भने बराल अस्पताल विकास समिति कर्मचारी युनियनका केन्द्रीय अध्यक्ष हुन् । उनीहरूले स्ट्यान्ड फ्यान, सर्जिकल मास्क, कम्प्युटरको स्क्रिन, स्यानीटाइजर, चप्पल, ग्लुस्टिक, साबुन, लामखुट्टे भगाउने धुप, बेगनलगायतका सामान तीन पोका बनाएर निकालेको देखिन्छ । यति भिडियो सार्वजनिक हुँदाहुँदै पनि त्यसलाई ढाकछोप गर्न महानगरपालिकाकी मेयर रेणु दाहाल स्वयं लागि परेको भन्दै भरतपुर महानगरपालिकाकी उपमेयर पार्वती शाह ठकुरी विरोध गर्न सडकमै आएकी थिइन् ।
उनको नेतृत्वमा भरतपुरमा विरोध मात्रै भएनन् कि जिल्ला प्रहरी कार्यालय चितवनमा आरोपित विरुद्ध किटानी जाहेरी समेत दिइएको छ । नेपाली कांग्रेसबाट निर्वाचित जनप्रतिनिधिहरुले आवश्यक छानविन हुनुपर्ने भन्दै चितवन प्रहरीमा जाहेरी दिएसँगै उनीहरुमाथि अहिले चितवन प्रहरीले छानविन गरिरहेको छ ।
तीन जना चिकित्सक जागिर छाडे
कोरोना अस्पतालमा कार्यरत तीनजना चिकित्सक काम गर्ने वातावरण नभएको भन्दै एक महिनापछि जागिर छाडेका थिए । अस्पताल प्रशासनमा पेश गरेको १० बुँदे माग पूरा नभएपछि उनीहरूले वैशाख ११ मा राजीनामा दिएका हुन् । तीमध्येका एक चिकित्सकले खानै नपाएर काम गर्न आएको जस्तो व्यवहार भोगेको बताए ।
यता, भरतपुर अस्पतालका मेसु डा. तिवारीले अस्पतालले नै कोरोना अस्पतालको जिम्मा लिइसकेपछि सुविधा दिएर डाक्टर राख्न आवश्यक नभएको बताए । बाँकी रहेका स्वास्थ्यकर्मी र सफाइ कामदारको असार मसान्तसम्मको तलब महानगरपालिकाले दिने उनले बताए ।
ट्वाइलेट तथा वाथरुममा २५ लाख खर्च तर आइसोलेसन कक्षमै शौचालयको पानी
चितवन उद्योग संघले भरतपुरमा बनाएको अन्तर्राष्ट्रियस्तरको प्रदर्शनी केन्द्रमा कोरोना अस्थायी अस्पताल बनाइएको छ । अस्पताल तयार पार्न ट्वाइलेट, वाथरुम निर्माणमा २५ लाख ४४ हजार ५ यस ४८ रुपैयाँ खर्च भएको विवरण पेस भएको छ । भरतपुर अस्पतालले व्यवस्थापन लिनुअघि सो अस्थायी अस्पतालका लागि एक करोड २६ लाख ४८ हजार रुपैयाँ खर्च भएको विवरण उल्लेख गरेको छ ।
केहीदिन अघि मात्रै कोरोना विशेष (अस्थायी) अस्पतालमा बस्नका लागि राम्रो व्यवस्थापन नभएको बिरामीहरुले गुनासो गरेका थिए । कोरोना विशेष अस्थायी अस्पतालमा रहेका कोरोना संक्रमितहरुले आइसोलेसन कक्षमै शौचालयको पानी बगेको अर्को भिडियो बिरामीहरु स्वयंमले सार्वजनिक गरेपछि अस्पताल पुनः विवादमा तानिएको थियो ।
संक्रमितहरुले आफूहरुको गुनासो कोरोना अस्पतालले नसुनेको, गुणस्तरीय खानाको व्यवस्था नगरेको जस्ता आरोपहरु लगाएका थिए । उनीहरुले अस्पतालको आइसोलेसन कक्षमा बाथरुमको पानी छिर्ने गरेको र पंखासमेत नभएको भन्दै गुनासो गरेका थिए । कोरानाका विरामीलाई राख्ने आइसोलेसन वार्डमा पाँच जनाका लागि एउटा मात्र टेबुल पंखा रहेकाले गर्मीका कारण त्यहाँ बस्न समस्या भएको बिरामीहरुले बताएका थिए ।
पटक—पटक अस्पताल प्रशासनलाई जानकारी गराउँदासमेत सुनुवाई नभएको त्यहाँ उपचारत कोरोना संक्रमित बिरामीको गुनासो छ । अस्पतालमै शौचालयको पानी बगेको खबर सार्वजनिक भएपछि त्यहाँ रहेका सबैलाई भरतपुर अस्पताल सारिएको थियो ।
भरतपुर अस्पताल विकास समितिका अध्यक्ष डा भोजराज अधिकारीले भने मर्मत सम्भारकोलागि बन्द गरीएको बताए । ‘मर्मत सम्भारकोलागि बन्द गरीएको हो ।’ उनले हेल्थ आवाज संग भने ‘सेवा स्थगीत गरीएको हो ।’ डा अधिकारीले कहिले बाट खुल्छ भन्ने कुरा बताएनन् ।
भरतपुर महानगरपालिकाको अग्रसरतामा खोलिएको कोरोना अस्पतालबाट ९ सय ५३ जना शंकास्पद बिरामीको मात्र स्वाब संकलन गरी आरटी पीसीआर विधिबाट कोरोना परीक्षणका लागि विभिन्न प्रयोगशाला पठाइएको थियो । यस्तै, सो अस्पतालमा २८ जना कोरोना भाइरस संक्रमितको व्यवस्थापन गरिएको अस्पतालले जनाएको छ ।
