काठमाडौं—नेपालमा थप १६६ जनामा कोरोना भाइरस (कोभिड—१९) को संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले आइतबार थप १६६ जनामा कोरोना संक्रमण पुष्टि भएको बताएका हुन् ।
प्रवक्ता डा. देवकोटाकाअनुसार नयाँ संक्रमित हुनेहरुमा बाँकेका ४ जना, नेपालगञ्जका ४ जना, सप्तरीका १२ जना, कैलालीका ३ जना, बाजुराका २ जना, झापाका ४ जना, धनुषाका २१ जना, तनहुँका १ जना, स्याङ्जाका २ जना, पर्साका ५ जना, कालिकोटका १८ जना, दैलेखका १८ जना, बाजुराका १ जना, सल्यानका २५ जना, सुर्खेतका १ जना , कपिलवस्तुका ५ जना, रौतहटका २९ जना, सर्लाहीका १० जना रहेको मन्त्रालयले जनाएको हो । संक्रमित मध्ये १४५० जना पुरुष र ११७ जना महिला रहेकाे छन् ।
पछिल्लो समय नेपालले कोरोना परीक्षण प्रयोगशालाको संख्या र परीक्षणको दायरा बढाएसँगै कोरोना संक्रमित पुष्टि हुने संख्या पनि बढिरहेको छ ।
यससँगै नेपालमा कोरोना संक्रमितको संख्या १ हजार ५ सय ६७ पुगेको हो । जसमध्ये २२० संक्रमितले कोरोना विरुद्धको लडाइ जितेका छन् । प्रवक्ता डा. देवकोटाले सम्मेलनमा जनाएअनुसार प्रदेश नम्बर १मा ३० जना, प्रदेश २ मा १ सय ४ जना, बागमती प्रदेशमा २९ जना, गण्डकी प्रदेशमा ३ जना, प्रदेश नम्बर ५ मा ४८ जना र सुदूरपश्चिम प्रदेशमा ६ जना संक्रमित कोरोना मुक्त भएका छन् ।
नेपालमा संक्रमण बढेसँगै संक्रमितहरुको मृत्यु पनि दिनानुदिन बढ्दै गएको प्रवक्ता डा. देवकोटाले बताए । पछिल्लो २४ घण्टामा मात्रै दुई संक्रमितको मृत्यु भएको छ। दैलेखमा गएको शनिबार एक जना पुरुष र आज विहान बाजुराकी एक बालिकाको मृत्यु भएसँगै कोभिडबाट ज्यान गुमाउनेको संख्या ८ पुगेको मन्त्रालयले जनाएको छ ।
यसअघि कोरोना संक्रमणले सिन्धुपाल्चोकमा १ महिला, बाँकेमा १ पुरुष, गुल्मीमा १ पुरुष, बाराका १ पुरुष, ललितपुरका १ पुरुष र अर्घाखाँचीका १ वृद्धको मृत्यु भएको थियो ।
