काठमाडौं—नेपालमा एकैदिन ११४ जनामा कोरोना भाइरस (कोभिड—१९) पोजेटिभ पुष्टि भएको छ । बुधबार स्वास्थ्य तथा जनसंख्या मन्त्रालयले थप ११४ जनामा कोरोना संक्रमण पुष्टि भएको जनाएको छ ।
राष्ट्रिय जनस्वास्थ्य प्रयोगशालामा गरिएको परीक्षणमा ३८ जनामा कोरोना भाइरस पुष्टी भएको हो । जसमध्ये रौतहटका १८ जना, बाराका ८ जना र सिरहा २ जना रहेका छन् । यस्तै, हेटौडास्थित प्रयोगशालामा गरिएको परीक्षणमा ८ जनामा कोरोना देखिएको हो । जसमध्ये ७ जना रौतहटका र १ जना मकवानपुरका रहेका छन् ।
धरानस्थित प्रयोगशालामा गरिएको परीक्षणमा सप्तरीका ११ जनामा कोरोना पोजेटिभ पुष्टी भएको छ । विराटनगरस्थित प्रयोगशालामा गरिएको परीक्षणमा १७ जनामा कोरोना पोजेटिभ देखिएको छ । जसमध्ये झापाको कचनकवल गाउँपालिका १५ र गौरादह नगरपालिकाका २ जनामा कोरोना पोजेटिभ देखिएको हो ।
पोखरास्थित प्रयोगशालामा गरिएको परीक्षणमा बाग्लुङका ६ जनामा कोरोना संक्रमण देखिएको हो । बाग्लुङ बढीगाड गाउँपालिकास्थित क्वारेन्टाइनमा रहेका २ जना, तमनखोला गाउँपालिकाको क्वारेन्टाइनमा रहेका ४ जना पुरुषमा पनि कोरोना गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा. विनोदविन्दु शर्माले जानकारी दिए ।
राप्ती स्वास्थ्य विज्ञान प्रतिष्ठानको प्रयोगशालामा गरिएको परीक्षणमा दाङका १५ जना र रुकुम पूर्वका ३ जना गरी १८ जनामा कोरोना संक्रमण देखिएको छ । यस्तै नेपालगन्जस्थित भेरी अस्पतालको प्रयोगशालामा गरिएको परीक्षणमा बाँकेका १६ जनामा पनि कोरोना पुष्टि भएको छ ।
बुधबार थप ११४ मा कोरोना संक्रमण देखिएसँगै नेपालमा कोरोना संक्रमितको संख्या ८८६ पुगेको छ ।
