काठमाडौ –सवारी दुर्घटनाका कारण दुवै खुट्टाको ठूलो हड्डी भाँचिएका एक कोरोना संक्रमित युवकको पाटन स्वास्थ्य विज्ञान प्रतिष्ठानमा जटिल शल्यक्रिया सम्पन्न भएको छ ।
प्रतिष्ठानका हाडजोर्नी शल्य चिकित्सक प्रा.डा. सुमन श्रेष्ठको नेतृत्वमा सो शल्यक्रियामा सम्पन्न भएको छ । ती युवकको दुवै खुट्टाको ठूलो हड्डी भाचिएको र बायाँ हिप खुस्किएको थियो । यो शल्यक्रिया कोभिड-१९ संक्रमित नेपालमै गरिएको पहिलो शल्यक्रिया हो ।
डेढ घण्टा लगाएर गरिएको सो शल्यक्रियामा कोभिड-१९ को संक्रमण उपचारमा संलग्न चिकित्सक तथा नर्स र स्वास्थ्यकर्मीलाई नसरोस भनेर पिपीईलगायत सम्पूर्ण सुरक्षा व्यवस्था अपनाएर शल्यक्रिया गरिएको प्रतिष्ठानका कोभिड-१९ व्यवस्थापन टिमका संयोजक डा. विमल पाण्डेले बताए ।
भारतको मुम्बईबाट आएका ती युवाको टेम्पो एक्सिडेन्ट परी दुवै खुट्टा भाँचिएपछि काठमाडौको राजधानी अस्पतालमा भर्ना भएका थिए । अस्पतालमा भर्ना भएपछि उनको कोभिड-१९ परिक्षण गर्दा पोजेटिभ देखिएको थियो । कोभिड पोजेटिभ देखिएपछि उनलाई शनिबार पाटन अस्पताल लगिएको थियो ।
पाटनमा वेड खाली नभएपछि काठमाडौ मेडिकल कलेजको दुवाकोट अस्पतालमा लगिएको थियो । आइतबार प्रतिष्ठानको अस्पतालमा रहेका ७ जना कोरोना संक्रमित डिस्चार्ज भएसँगै आइतबार बिहानै उनलाई ल्याएर शल्यक्रिया गरिएको डा. पाण्डेले बताए ।
