काठमाडौं—नेपालमा कोरोना भाइरस (कोभिड–१९) संक्रमितको उपचारका लागि ३४५ आईसीयु वेड तयार भएका छन् । केस बढ्दै जान थालेपछि देशभरका कोभिड—१९ अस्पतालहरुमा संक्रमितलाई राख्न ३४५ आईसीयु र १४६ वटा भेन्टिलेटर तयारी अवस्थामा राखिएको हो ।
स्वास्थ्य मन्त्रालयका अनुसार देशभरका अस्पतालमा २६ हजार ९ सय ३० वेड छन् भने ९०९ आईसीयु वेड १ हजार ५ सय ९५ रहेका छन् । यस्तै, देशभर ८ सय ४० भेन्टिलेटर छन् । सरकारले देशभर रहेका आईसीयु र भेन्टिलेटरमध्ये २० प्रतिशत कोभिड—१९ का बिरामीका लागि प्रयोग हुन सक्ने आँकलन गरेको छ । अन्य बाँकी रहेका भने नियमित बिरामीका लागि चाहिने प्रक्षेपण गरेको छ ।
विश्व स्वास्थ्य संगठनकाअनुसार प्रति सय संक्रमितमध्ये २० जनालाई आईसीयुको आवश्यकता पर्छ । त्यसमध्ये ५ प्रतिशतलाई भेन्टिलेटर चाहिन्छ ।
सरकारले कोभिड—१९ पुष्टि भएको साढे तीन महिनामा ३ सय ४५ आईसीयु बेड तयार पारेको हो । अन्य ५६४ आईसीयु बेड भने नियमित रुपमा संचालन हुनेछन् । स्वाथ्य मन्त्रालयले पहिलो चरणमा कोभिड—१९ संक्रमितको उपचार गर्न २५ अस्पताल तय गरेको छ । मन्त्रालयका सह—प्रवक्ता डा. समिर अधिकारीका अनुसार कोरोना संक्रमित व्यक्तिका लागि मात्रै ९७४ आइसोलेसन वेड तयार भएको छ । प्रयोगशाला परीक्षणमा कोरोना पुष्टि भएका तर, स्वास्थ्य अवस्था सामान्य भएका बिरामीका लागि आइसोलेसनमा राखेर लक्षण अनुसार उपचार गरिन्छ ।
कोरोना संक्रमितलाई आईसीयुमा राख्नु परे छुट्टै जनशक्तिको आवश्यकता पर्छ । तर, सरकार समक्ष देशभर २९ जना मात्रै यस्ता क्रिटिकल केयर हेर्ने एनेस्थेसियातर्फका चिकित्सक छन् । सरकारले क्रिटिकल केयर हेर्ने एनेसथेसिया अभाव देखेपछि स्वास्थ्यकर्मीलाई तालिम दिएर क्रिटिकल केयर जनशक्ति ३१७ जना तयार पारेको छ । यता नेपाल मेडिकल काउन्सिलमा केयर हेर्ने एनेसथेसिया ५१० जना दर्ता भएका छन् ।
