विराटनगर—धरानस्थित विपी कोइराला स्वास्थ्य विज्ञान प्रतिष्ठानबाट बुधबार राती १३ दिनको नवजात शिशु चोरी भएको छ । शिशु चोरीको आरोपमा प्रहरीले दुईजना महिलालाई नियन्त्रणमा लिएको छ । पक्राउ पर्नेमा धरान—१५ की लीला विक र उनकी भाउजु मीना लिम्बु विक रहेको इलाका प्रहरी कार्यालय धरानले जनाएको छ ।
पक्राउ पर्ने नन्द भाउजु रहेको प्रहरीले जनाएको छ । नवजात शिशुलाई धरान–१५ बगरकोटमा फेला पारिएको थियो । लीलाका श्रीमान् भारतको दिल्लीमा बस्दैं आएको बताइएको छ । नवजात शिशुलाई उनीहरूले भारतको दिल्ली लैजाने तयारी गरेका थिए ।
लीलाको सन्तान नभएका कारण आफूले छोरा बनाएर पाल्ने उद्देश्यले नवजात शिशुको अपहरण शैलीमा चोरी गरेर लगेको प्रहरीको प्रराम्भिक चरणको अनुसन्धानबाट खुलेको छ । अनुसन्धानको क्रममा पक्राउ परेकी लीलाले आफूले पाल्नका लागि लगेको बयान क्रममा प्रहरीलाई बताएको इलाका प्रहरी कार्यालयका डिएसपी ढुण्डीराज न्यौपानेले जानकारी दिए ।
अहिले अनुसन्धानको क्रममा रहेकोले थप विषय बिस्तारै खुल्ने उनले बताए । उनीहरु विरुद्ध बच्चा चोरी तथा अपहरणको जाहेरी आएको प्रहरीले जनाएको छ । १०÷ १२ दिनदेखि बच्चा जन्मिएपछि राख्ने वार्डतिर नै बसेर सहयोग गरेजस्तो गरेर विश्वास जितेर हिजो राती आफन्त निदाएको बेला बच्चा चोरी गरेको पाइएको डिएसपी न्यौपानेले बताए ।
चोरी भएको सुनसरीको भोक्राहा नर्सिङ गाउँपालिका—१ का जितनारायण मेहता र बबिता मेहताको छोरा हुन् । बबिताले गत असार १३ गते छोराको जन्म दिएकी थिइन् । आमा र बच्चा दुवैको स्वास्थ्यमा समस्या देखिएपछि उनीहरुको वार्डमा नै राखेर उपचार भैरहेको चिकित्सकले जनाएका छन् ।
लीला विक वार्डमा कुरुवाजस्तो भएर बस्दैं आएको थियो । उक्त शिशुलाई अर्को मान्छे बोलाएर सबै निदाएको बेला लगेको बताएको छ ।
