रुखबाट लडेर घाइते भएकी महिलाको हेलिकोप्टरबाट उद्धार

हेल्थ आवाज शनिबार, २०७७ वैशाख १३ गते, १२:०८ मा प्रकाशित

धनगढी—घाँस काटने क्रममा रुखबाट लडेर गम्भीर घाइते भएकी बाजुरामा महिलाको उपचारका लागि हेलिकोप्टरबाट उद्धार गरिएको छ । बिहीबार घाँस काट्ने क्रममा रुखबाट खसेपछि उनको मेरुदण्ड भाँचिएको थियो ।

बडिमालिका नगरपालिका–८ बस्ने ३५ वर्षीया धनमती रावल रुखबाट खसेर गम्भीर घाइते भएपछि गृह मन्त्रालयको सहयोगमा नेपाली सेनाको हेलिकोप्टरबाट उनलाई उपचारका लागि काठमाडौं ल्याइएको हो ।

उनलाई शनिबार बिहान काठमाडौंको ट्रमा सेन्टरमा उपचारका लागि भर्ना गरिएको बाजुराका प्रमुख जिल्ला अधिकारी गंगाप्रसाद न्यौपानेले बताए ।

बिहीबार पाला काट्ने क्रममा लडेर मेरुदण्ड भाँचिएकी धनमतीलाई जिल्ला अस्पताल बाजुरामा उपचार सम्भव नभएपछि काठमाडौं ल्याइएको हो ।

जिल्ला अस्पताल बाजुराका प्रमुख डा. रुपचन्द्र विश्वकर्माका अनुसार ती महिलाको मेरुदण्ड भाँच्चिएकाले बाजुरा अस्पतालमा उपचार सम्भव नभएको हो ।