विराटनगर- विराटनगरमा सर्जिकल मास्क र सेनिटाइजरको बजारमा अभाव देखाएर कालोबारी गर्ने विराटनगरका व्यापारीलाई कालोबजारी ऐन अन्तर्गत सात दिनको म्याद थप गरिएको छ ।
अनुचित लाभ लिने उद्देश्यले मास्क र सेनिटाइजरको कालोबजारी गर्ने विराटनगर–९ का ‘श्री सर्जी इम्पेक्स’ का सञ्चालक ४७ वर्षीय राजेशकुमार अग्रावाललाई जिल्ला प्रशासन कार्यालय मोरङमा सोमबार सात दिन म्याद थप गरिएको हो ।
कालोबजारी ऐन अन्तर्गतको मुद्दामा जिल्ला प्रशासन कार्यालयमा चल्ने भएकोले पक्राउ परेका अग्रावललाई सात दिनको म्याद थप गरि अनुसन्धान सुरू गरेको प्रहरीले जनाएको छ ।
कोरोना भाइरस (कोभिड १९) को प्रकोपको बेला भाइरसबाट बच्न अनिवार्य रूपमा सर्जिकल मास्कस र सेनिटाइजरको प्रयोग गर्नुपर्ने अवस्थामा बजारमा कृत्रिम अभाव सृजना गरि कालोबजारी गर्ने अग्रवाललाई आइतबार पक्राउ गरिएको थियो । उनीमाथि थप कार्वाहीको लागि म्याद थप गरिएको मोरङ प्रहरीका प्रवक्ता डिएसपी मानबहादुर राईले जानकारी दिए ।
अनुचित लाभ लिने उद्देश्यले कालोबजारी गर्ने गरेको पाइएपछि वाणिज्य आपूर्ति तथा उपभोक्ता संरक्षण कार्यालय विराटनगरले अग्रवाललाई आइतबार नै ३ लाख रूपैयाँ जरिवाना गरेको थियो । सर्जिकल सामान तथा औषधीको थोक विक्रेता तथा सर्जी इम्पेक्सका सञ्चालक अग्रवाललाई उपभोक्ता ऐन अनुसार कारबाही अन्तर्गत कारवाही गरेपछि थप कारवाहीको लागि कालोबजारी ऐन अन्तगएत कार्वाही अगाडि बढाएको डिएसपी राईले बताए ।
कोरोना भाइरसको प्रकोपको बेला सर्जिकल मास्कको कालोबजारी गरि अनुचित लाभ लिने मनसाय देखिएको पाइएकोले उपभोक्ता ऐन अनुसार कारवाही गरेपछि थप कार्वाहीको लागि वाणिज्य आपूर्ती तथा उपभोक्ता संरक्षण कार्यालय विराटनगरले अग्रवाललाई प्रहरीको जिम्मा लगाएको थियो । विराटनगर महानगरपालिकाको स्वास्थ्य महाशाखाको टोली, औषधी व्यवस्था विभाग विराटनगर, वाणिज्य कार्यालय र मोरङ प्रहरीले संयुक्त रूपमा गरेको अनुगमनको क्रममा आइतबार दिउँसो श्री सर्जी इम्पेक्सबाट ११ हजार ३ सय ५० थान मास्क र ४ सय थान सेनिटाइजर बरामद भएको थियो ।
कोलोबजारी तथा केही अन्य सामाजिक अपाराध तथा सजाय ऐन २०३२ दफा ५ मा बजारमा कुनै बस्तुको अभाव हुनेगरि अनुचित नाफा लिइ बजारमा बिक्री गर्ने नियतले त्यस्तो मालबस्तुको संग्रह गरेमा १ वर्षसम्म कैद वा २ लाख ५० हजार रुपैयाँसम्म जरिवना वा दुबै सजाय हुनसक्ने व्यवस्था रहेको छ ।
