धनगढी—पश्चिमी सीमा नाका गड्डाचौकीबाट नेपाल भित्रिनेहरुको स्वास्थ्य परिक्षणका लागि नेपाली सेनाको स्वाथ्यकर्मीको टोली खटिएको छ । शुक्रबारदेखि सेनाले गड्डाचौकीस्थित हेल्थ डेस्कमा स्वास्थ्य परिक्षणका लागि पाँच जनाको स्वास्थ्यकर्मीको टोली खटाएको हो ।
यहाँको श्री न. २५ बाहिनी अड्डा र सिंह शार्दुल गुल्म भगतपुर ब्यारेकको श्री न. २५ फिएको सैनिक स्वास्थ्यकर्मीको टोली खटिएको सेनाले जनाएको छ ।
सेनाले कोरोना भाइरसको जोखिम न्यूनीकरणका लागि जिल्ला सुरक्षा समितिलगायत विभिन्न निकायसँगको सहकार्यमा काम गर्न तत्पर रहेको श्री नं. २५ बाहिनी अड्डाले जनाएको छ ।
श्री न.२५ बाहिनी अड्डाका बाहिनीपति सहायक रथी शंकरबहादुर पण्डित, प्रमुख सेनानी जीवन कार्की, सिंह शार्दुल गुल्मका गुल्मपति प्रणयजंग मल्ल,बाहिनीका सेनानी गोरख पुजारा र श्री न. २५ फिएका डा.अल्का मजगैयाले ब्रह्मदेव र गड्डाचौकी सीमा नाकाको स्थलगत अवलोकन समेत गरेका थिए ।
संक्रमणको त्रास फैलिएपछि पश्चिमी नाका गड्डाचौकी भएर नेपाल फर्किनेको संख्या बढ्दै गएको छ । रोजगारीका लागि भारत गएका नेपालीहरु घर फर्कन थालेका हुन । हेल्थ डेस्क गड्डाचौकीका अनुसार नेपाल भित्रिनेको संख्या दैनिक चारदेखि पाँच हजार छ ।
