वीरेन्द्रनगर—रुकुम पश्चिमको चौरजहारी अस्पतालमा पाँचौं ब्याचको दक्ष प्रसूतिकर्मी दुई महिने तालिम सम्पन्न भएको छ । बुधबार चौरजहारी नगरपालिका–१ मा अवस्थित मानव विकास तथा सामुदायिक सेवाद्धारा संचालित चौरजहारी अस्पतालको सभाहलमा संचालन भएको दुई महिने दक्ष प्रसूतिकर्मी तालिम सम्पन्न भएको हो ।
सामाजिक विकास मन्त्रालय मानव संशाधन विकास केन्द्र कर्णाली प्रदेश सुर्खेतको आयोजना र चौरजहारी अस्पतालको आर्थिक तथा प्राविधिक सहयोगमा तालिम भएको थियो ।
पाँचौं ब्याचको नर्सिङ कर्मचारीहरुका लागि संचालन गरिएको दक्ष प्रसूतिकर्मी तालिममा रुकुम पश्चिम, सल्यान, जाजरकोट र डोल्पा जिल्लाका १० जना नर्सिङ कर्मचारीहरुको सहभागिता रहेको प्रशिक्षक रमा शाहले बताइन् ।
तालिममा सुरक्षित मातृत्व, सम्बन्धि समस्याको पहिचान, समयमा निदान, व्यवस्थापन तथा गम्भीर प्रकृतिका गर्भवती आमाहरुलाई प्रेषण गर्ने विषयमा सहजीकरण गरिएको तालिमका प्रशिक्षक लक्ष्मी शाहले जानकारी दिइन् ।
अस्पतालले सुरक्षित मातृत्व सेवामा आशातीत लक्ष्य हासिल गरेपछि स्थानीय सरकार र प्रदेश सरकार सामाजिक विकास मन्त्रालयले अस्पतालमा दक्ष प्रसूतिकर्मी तालिम संचालनको लागि अनुमति दिएको थियो ।
तालिम गत ७ पुसदेखि सुरु भएको थियो । कर्णाली प्रदेशमा सुर्खेत, जुम्ला र रुकुम पश्चिमको चौरजहारी अस्पताल गरी तीन ठाउँमा दक्ष प्रसूतिकर्मी तालिम केन्द्र रहेका छन् ।
