वीरेन्द्रनगर—सुर्खेतको वीरेन्द्रनगरमा पाठेघरको मुखमा हुने क्यान्सर रोगविरुद्धको खोप अभियान शुभारम्भ भएको छ । बुधबार वीरेन्द्रनगर नगरपालिकाका प्रमुख मोहनमाया ढकालले आगामी ६ फागुनसम्म सञ्चालन हुने खोप अभियानको शुभारम्भ गरेकी हुन् ।
श्रीकृष्ण संस्कृत साधारण माविबाट सुरु भएको अभियान जिल्लाका नौ वटै स्थानीय तहमा सञ्चालन हुनेछ । अभियानको शुभारम्भ गर्दै नगर प्रमुख ढकालले किशोरावस्थामा हुन सक्ने पाठेघरको मुखको क्यान्सरको जोखिम घटाउने उद्देश्यले खोप अभियान थालिएको बताइन् ।
‘यो खोप अन्य नियमित खोपसरह सुरक्षित रहेको छ,’ उनले भनिन्, ‘ढुक्क भएर अभियानमा संलग्न हुन आवश्यक रहेको छ ।’ नगरपालिकाले महिलामा हुने विभिन्न प्रकारका क्यान्सरको निःशुल्क पहिचानदेखि उपचारमा सहयोग गर्दै आएको नगर प्रमुख ढकालले जानकारी दिइन् ।
अभियानअन्तर्गत सुर्खेतमा २५ हजार ५१७ किशोरीलाई पाठेघरको मुखमा हुने क्यान्सरविरुद्धको एचपीभी खोप लगाइने छ । जिल्लाका नौ वटै स्थानीय तहमा विद्यालय जाने र नजाने ९ देखि १४ वर्षका किशोरीहरूलाई उक्त खोप लगाउन लागिएको हो । जसमा २४ हजार ९७५ विद्यालय जाने छात्रा र ५५७ जना विद्यालयबाहिर रहेका किशोरी छन् ।
विद्यालयमा अध्ययनरत कक्षा ६ देखि १० सम्मका छात्रा र विद्यालय नजाने ११ देखि १४ वर्षसम्मका किशोरीहरूलाई पाठेघरको मुखमा हुने क्यान्सरविरुद्धको एचपीभी खोप लगाउन लागिएको जिल्ला जनस्वास्थ्य सेवा कार्यालय सुर्खेतका प्रमुख गणेशभक्त गौतमले बताए ।
