जुम्ला—नेपाल सरकारले संस्थागत रुपमा सुरक्षित सुत्केरी दर वृद्धि गर्ने उद्देश्यअनुरुप जुम्लामा आमा कुरुवा घर (आवास गृह) सञ्चालनमा ल्याएको छ । आर्थिक वर्ष २०७९/०८० सालदेखि जुम्लामा जनस्वास्थ्य सेवा कार्यालयले आमा कुरुवा घर सञ्चालनमा ल्याएको हो ।
जनस्वास्थ्य सेवा कार्यालय जुम्ला कार्यालय प्रमुख कृष्ण सापकोटाका अनुसार हिमाली तथा पहाडी जिल्लामा गर्भवती तथा सुत्केरी महिलाका लागि आवास गृह सञ्चालन गरिएको हो । ‘हिमाली जिल्लामा घरदेखि स्वास्थ्य संस्थासम्मको दुरी टाढा हुने भएकाले गर्भवती तथा सुत्केरी महिलाका लागि आवास गृहको व्यवस्था गरिएको हो,’ सापकोटाले भने । गर्भवती तथा सुत्केरी महिलालाई ४५ दिनसम्म खाना, खाजा र बासको व्यवस्था कार्यालयले गरेको हो ।
डिभिजन वन कार्यालय नजिकै गर्भवती र सुत्केरी महिलाका लागि बस्ने घरको व्यवस्था गरिएको उनले बताए । ‘गर्भवती र एक जना कुरुवाको लागि प्रतिदिन प्रति व्यक्ति ३५० देखि ४ सय रुपैयाँको दरले खाना खाजा उपलब्ध गराउँदै आएका छौं,’ उनले थपे ।
सापकोटाका अनुसार सुत्केरी महिलाको लागि प्रतिदिन प्रतिव्यक्ति ४५० देखि पाँच सय रुपैयाँका दरले खाना खाजा उपलब्ध गराउने गरिएको छ । जुम्लामा गत आर्थिक वर्षमा कनकासुन्दरीका ३ जना, तिलाका १ जना, पातारासीका १ जना, सिंजाका गाउँपालिकाका २ जना गर्भवती तथा सुत्केरी महिला र कुरुवाले सेवा लिएका छन् ।
यस्तै, जिल्ला बाहिरका मुगुका ४ जना र अन्य १ गरी गत वर्ष १२ जनाले सेवा लिएको सापकोटाको भनाइ छ । उनकाअनुसार औसतमा १८ दिन, न्यूनतम १ दिन र बढीमा ४९ दिनसम्म गर्भवती तथा सुत्केरी महिला आवासमा बसेका छन् । यस्तै, चालु आर्थिक वर्षको माघ पहिलो सातासम्म ९ जना गर्भवती तथा सुत्केरी महिलाले सेवा लिएको सापकोटाको भनाइ छ । जसमा सिंजाका १, हिमाका १ र कनकासुन्दरी गाउँपालिकाका १ जना, कालिकोटका १, जाजरकोटका १, मुगुका ३ जना र डोल्पा जिल्लाका १ जना गर्भवती तथा सुत्केरी महिलाले सेवा लिएका छन् । दुई जना अहिले पनि आमा कुरुवा घरमा बस्दै आएका छन् ।
सरकारले जुम्लासहित २० वटा जिल्लामा आवास गृह संचालन गरेको छ । गर्भवती तथा सुत्केरी महिलाका लागि संचालन भएको आवास गृहले सहज बनाएको जनस्वास्थ्य सेवा कार्यालय जुम्लाले जनाएको छ ।
