वीरेन्द्रनगर—कालिकोटको रास्कोट नगरपालिकाको रास्कोट अस्पतालमा स्वास्थ्य बीमा कार्यक्रम लागु हुने भएको छ । कालिकोटमा जिल्ला अस्पताल र नरहरिनाथको योगी नरहरिनाथ अस्पतालमा मात्र रहेको स्वास्थ्य बीमा अब रास्कोट नगर अस्पतालमा पनि लागु भएको हो ।
स्वास्थ्य बीमा बोर्डले आवश्यक पूर्वाधार र जनशक्ति भएको खण्डमा स्थानीय तहमा यो सेवा लागु गर्ने नीति लिएका कारण कालिकोटमा जिल्ला अस्पताल, नरहरिनाथ गाउँपालिकाको योगी नरहरिनाथ प्राथामिक अस्पताल र रास्कोट अस्पतालबाट स्वास्थ्य बीमा कार्यक्रम लागु भएको हो ।
शुक्रबार एक कार्यक्रमबीच कर्णाली प्रदेशका सामाजिक विकासमन्त्री घनश्याम भण्डारीले औपचारिक रास्कोट अस्पतालमा स्वास्थ्य बीमा लागु गरिने घोषणा गरेका हुन् ।
राज्यले घोषणा गरेको कार्यक्रमबाट देशका सबै नागरिकले सेवा पाउनुपर्ने बताउँदैं मन्त्री भण्डारीले रास्कोट अस्पतालबाट पनि यो सेवा प्रवाह हुने बताए । अन्य पालिकामा पनि यो सेवा लागु गरिनुपर्ने उनको भनाइ थियो ।
स्वास्थ्य बीमा गरेका गाउँका नागरिकले निःशुल्क उपचार पाउन जिल्ला अस्पताल र अन्य जिल्ला जानुपर्ने बाध्यता हटेको नगर प्रमुख धर्मराज शाहीले बताए ।
