जुम्ला—जिल्ला अस्पताल हुम्लामा पछिल्लो समय बिरामीको चाप अत्याधिक बढ्न थालेपछि औषधि किन्न निजी मेडिकल तथा फार्मेसी धाउनुपर्ने बाध्यता भएको छ । जिल्ला अस्पतालमा उपचारका लागि सदरमुकाम आसपास गाउँ ठेहे, दाजाम, डाँडाफया, धारापोरी, बुराउँसे, बरगाउँ, याँचु, माजा, छिप्रालगायतका गाउँबाट बिरामी पुग्ने गरेका छन् ।
जिल्ला अस्पतालमा बिरामीको चाप बढेपछि सेवाग्राहीले निजी मेडिकलबाट औषधि किन्नुपर्ने बाध्यता रहेको सेवाग्राही ऐटन रावलले गुनासो गरे । उनले आफ्ना छोरालाई कडा खाले ज्वरो आएर जिल्ला अस्पताल लैजाँदा निजी मेडिकलबाट औषधि किन्नु परेको बताए ।
मौसमी रुघाखोकीका बिरामी बढ्दा अस्पतालले धान्न नसक्ने गरी बिरामी उपचारका लागि पुग्ने गरेको जिल्ला अस्पतालका सिनियर अनमी सरिता बोहराले बताइन् । मौसमी बिरामीको चाप अत्याधिक बढेसँगै अस्पतालमा बिरामी राख्ने शैय्याको पनि अभाव हुन थालेको अनमी बोहराको भनाइ छ ।
बोहराकाअनुसार १५ शैय्या क्षमता भएको जिल्ला अस्पतालमा एक सातादेखि बिरामी बढी भर्ना हुँदा प्रसुती गृहलगायतका वार्डमा समेत बिरामीलाई राखेर उपचार गर्न थालिएको छ ।
उपचार गर्न आउने बिरामीको चाप बढ्दा भर्ना भएर डिस्चार्ज भएका कतिपय बिरामीलाई पनि पुनः अस्पतालमै भर्ना गर्नुपर्दा समस्या हुने गरेको छ । वर्षायाममा हुने मौसम परिवर्तनलगायतका कारण जिल्ला अस्पतालमा बिरामीको संख्या बढेपछि बेडको अभाव भएको छ ।
जिल्ला अस्पतालमा धेरैजसो मौसमी रुघाखोकी र ज्वरोका बिरामीहरू आउने गरेको अस्पतालका डा. सुनिल पुजाराले बताए । अहिले बालबालिकाहरूमा पनि ज्वरोको समस्या बढी देखिएको डा. पुजाराले उल्लेख गरे । जिल्ला अस्पतालमा दैनिक १ सय ५० जना बिरामी औषधि उपचार गर्दै आएका छन् । जसमा सबैभन्दा बढी ज्वरोका बिरामी, झाडापखाला, निमोनिया र ग्याष्ट्रिकलगायतका बिरामीले उपचार गराएको जिल्ला अस्पतालका डा. पुजाराले बताए ।
