जुम्ला—जुम्लामा अन्तर मेडिकल कलेज बीच खेलकुद प्रतियोगिता हुने भएको छ । कर्णाली स्वास्थ्य विज्ञान प्रतिष्ठान जुम्लाको आयोजनामा भदौँ १६ – २१ गतेसम्म अन्तर मेडिकल कलेज खेलकुद प्रतियोगिता हुने भएको हो ।
माथिल्लो कर्णाली जुम्लामा मेडिकल कलेज कर्णाली स्वास्थ्य विज्ञान प्रतिष्ठान स्थापना भएको १३ वर्षपछि पहिलो पटक यो खेलकुद प्रतियोगिता हुन लागेको हो ।
कर्णाली स्वास्थ्य विज्ञान प्रतिष्ठान, यहाँको कृषि, पर्यटन सम्भावनालाई देशमा चिनाउन उद्देश्यले खेलकूद प्रतियोगिता गर्न लागिएको प्रतिष्ठानका खेलकूद समितिका संयोजक डा. विवेक पुनले जानकारी दिए ।
नेपालमा हरेका सम्पूर्ण मेडिकल कलेज तथा कलेजमा अध्ययनरत विद्यार्थीहरुबीच सामीप्यता बढाउने साथै यस कार्यक्रमको माध्यमबाट कर्णाली चिनाउने उद्देश्य राखिएको उनको भनाइ छ ।
प्रतियोगितामा सहभागी हुन देशभरका २७ वटा मेडिकल कलेजलाई पत्राचार गरिएको थियो । जसमा पाँच वटा मेडिकल कलेजले प्रतियोगितामा सहभागिता जनाउने भएका छन् ।
मधेश स्वास्थ्य विज्ञान प्रतिष्ठान जनकपुरधाम धनुषा, राजर्षिजनक विश्वविद्यालय जनकपुरधाम धनुषा, मदन भण्डारी स्वास्थ्य विज्ञान प्रतिष्ठान हेटौडा मकवानपुर, किस्ट मेडिकल कलेज ललितपुर र महाराजगंज चिकित्सा क्याम्पस, चिकित्साशात्र अध्ययन संस्थान, महारजगंज काठमाडौंका विद्यार्थी सहभागी हुने भएका छन् ।
पाँच वटा मेडिकल कलेजका १२० जना खेलाडीले प्रतियोगितामा भाग लिनेछन् । सबै विद्यार्थीको खाने बस्ने तथा यातायातको व्यवस्थापन प्रतिष्ठानले नै गरेको छ ।
खेलकुद प्रतियोगिता कार्यक्रममा ८ विद्याका खेल समाहित गरिएका छन् । जसमा महिला पुरुष भलिबल, फुटबल, क्रिकेट, टेबलटेनिस, चेस, दौड, कविता र हाजिरीजवाफ प्रतियोगिता रहेका छन् । जसमा जुम्ला बहुमुखी क्याम्पमा भलिबल, कर्णाली प्राविधिक शिक्षालयमा क्रिकेट, देवीदत्त गणको प्रांगणमा फुटबब प्रतियोगिता हुनेछ ।
प्रतियोगितामा प्रथम, द्धित्तीय र तृतीय हुनेलाई क्रमशः नगद एक लाख, ७५ हजार र ५० हजार मेडल प्रमाण पत्रसहित पुरस्कार प्रदान गरिनेछ ।
धेरै टाढाबाट आएर खेलबाट कर्णाली चिनाउने अभियानलाई सफल बनाउन जुम्ला पुगेका टिममध्ये उत्कष्टलाई प्रोत्साहन स्वरुप नगदसहित पुरस्कार दिने तयारी गरिएको प्रतिष्ठानका रजिष्ट्रार नृपेन्द्र महतले बताए ।
कर्णालीमा रहेका प्रचुर पर्यटकीय स्थलहरु रहेको कर्णालीमा आमन्त्रित विद्यार्थीलाई मुगुस्थित रारा ताल अवलोकन गराउने व्यवस्थासमेत गरिएको छ । जसले गर्दा भविष्यमा कर्णालीको पर्यटन विकासमा टेवा पुग्ने अपेक्षा गरिएको छ । प्रतियोगिता सञ्चालनका लागि अनुमानित २० लाख रुपैयाँ खर्च हुने अनुमान गरिएको छ ।
