वीरेन्द्रनगर—रुकुम पश्चिम जिल्ला अस्पतालमा ब्लड बैंक स्थापनाले सहजता आएको छ । जिल्ला अस्पतालमा उपचार गराउन आउनेहरूलाई रगत आवश्यकता परेको खण्डमा समस्या भइरहेकामा गत वर्ष ब्लड बैंक स्थापना भएपछि भने हाल सजिलो भएको हो ।
विभिन्न कारणले रगत चढाउनुपर्ने बिरामीलाई ब्लड बैंकले सहज बनाएको हो । जिल्ला अस्पतालमा २०८० कार्तिक १३ गते ब्लड बैंक स्थापना भएको थियो । यसमा रूपान्तर नेपाल, नेपाल रेडक्रस सोसाइटीलगायतले सहयोग गरेका छन् ।
जिल्लामा ब्लड बैंक स्थापना भएदेखि हालसम्म ९३ जनाले रगत दान गरेका छन् । केही स्वतस्फूर्त रक्तदान गर्नेहरू छन् भने अधिकांश बिरामीलाई आवश्यक परेपछि रक्तदान गर्नेहरू छन् । हालसम्म ९३ जनाले रक्तदान गरेकामा ९० जना बिरामीलाई रगत दिइएको ब्लड बैंकका ल्याब टेक्निसियन पुष्कर केसीले बताए ।
‘चालु आर्थिक वर्षको साउन महिनामा मात्र १२ जनाले रक्तदान गरिसकेका छन्,’ उनले भने, ‘जिल्ला अस्पतालमा ब्लड बैंक स्थापना भएपछि धेरै नै सजिलो भएको छ ।’
केही मात्रामा हामीसँग रगत स्टक हुन्छ, स्टक सकिएको वा नभएको अवस्थामा हामीसँग धेरै रक्तदाताहरूको रेकर्ड छ त्यसबाट समय पुगेकाहरूलाई रक्तदानका लागि अनुरोध गर्ने गरेको केसीले जानकारी दिए ।
